Фамелия Бережнї Фамелия Бережнї
Робиц, робиц и лєм робиц… Зоз далєкей Галїцкей жеми, под Австро-Угарску монархию, на драгу до нового живота рушели троме браца Бережнї. Єден погинул на... Фамелия Бережнї

Робиц, робиц и лєм робиц…

Зоз далєкей Галїцкей жеми, под Австро-Угарску монархию, на драгу до нового живота рушели троме браца Бережнї. Єден погинул на териториї нєшкайшей Мадярскей, други ше рушел на ище дальшу драгу до Америки, а до Панонскей нїжини стигол єдини Иван Бережнї и його животна сопутнїца Зуска.

Орґиналне презвиско по руски Бережнї, при прекладу на сербски язик було би Бережњи, медзитим зоз писаньом у матрикулох и општинских паперох, дахто место букви нь дакеди написал н, так же ше тота фамелия даґдзе водзи и як Бережнї и як Бережни.

До Митровици стигли у другей половки XIX вику з вельку надїю до лєпшого живота и населєли ше на дакедишнєй перифериї городу, односно на простору нєшкайшого населєня Шалабара.

Иван ше прилапел шицких чежких роботох и зоз Зуску мал двойо дзеци Василя и дзивку Kатицу.

Катица рано напущела тот швет, змарзла ше у вельким шнїгу, при преходу пруґи, охабела за собу сина Триву.

Василь и Любица Бережнї

Иванов син, млади  Василь ше оженєл зоз Рускиню, Любицу народзену Горбаль и мали дзевецеро дзеци, од хторих двойо Емица и Петар (старши) умарли ище як беби.

Дзеци Владимир, Дюра, Митро, Петар, Иван, Аница (одата Петрас) и Вера (одата Штефанац) жили у злоги и заєднїцтву. Здобували барз швидко, куповали и обробйовали жем, виучовали рижни ремесла и постали познати  и углядни митровацки ремесельнїки.

По руски бешедовал єдино Василь зоз супругу Любицу, покля шлїдуюца ґенерация траци язик, прето же живот бул таки же були у нєпоштреднїм контакту зоз векшинским сербским жительством и другима народами зоз хторима мушели каждодньово комуниковац, потим школство и нєпостоянє образованя на руским язику, асимилация и мишани малженства приведли ґу тому же ше у фамелиї Бережнї вецей нє бешедує по руски.

Потомки фамелиї Бережнї почали ознова зоз виучованьом язика при Дружтву Руснацох Сримска Митровица, занїмаюци ше тиж зоз очуваньом националного идентитета Руснацох у Митровици и допринєсли културно уметнїцкому животу городу. Медзи першима участвовали у святочней академиї под назву „Мацери Рускинї“, зоз хтору ше означує рочнїца присельованя Руснацох на простор городу Сримска Митровица.

Виросли до познатих и чесних ремесельнїкох и земєдїлцох, браца Бережнї вибудовали себе хижи у дакедишнєй Оборскей улїци и улїци Нови шор.

У фамелиї бул присутни моцни дух заєднїцтва и медзисобного помаганя.

Припадаю грекокатолїцкей конфесиї и були одани своєй грекокатолицкей у народзе познатей Рускей церкви, та участвовали у єй будованю и охрани. У фамелиї ше преприповедала приповедка же ше їх предок Василь  у папучох пендрал на церковну турню намесциц криж.

Без огляду цо потомки Бережнї нє бешедую по руски, свидомосц о тим же су Руснаци остала розвита и моцна.

Шицки браца виучели ремесла, Иван месарски и до пензиї робел на Митросу, Владимир  шуштерски, Дюра столарски, Митар тапетарски, Петар коларски и нашлїдзел жем од оца предлужел ше занїмац зоз польопривреду.

На далєко познати ремесельнїки постали Дюра Бережнї столар и його брат  Митар тапетар.

Браца Иван, Влада, Дюра, Митар и Петар Бережнї

Столарску и тапетарску роботню тримали дома у Оборскей улїци.

Дюра Бережни бул ученїк познатого майстра Чуздия, робел квалитетну столарию и у його роботнї правени кухнї и шицки файти меблю. Його роботи, квалитетни и на далєко познати и нєшка прикрашую велї митровацки обисца. Його перфектна столария доведзена до уметносци.

У своїм роботним вику даскельо раз наградзени за свою роботу, од того добитнїк є три златни медалїї на сайме ремеслох, вецей роки бул предсидатель здруженя ремесельнїкох, а и делеґат за здравство Митровици.

Важне надпомнуц же Дюра Бережнї за Грекокатолїцку церкву у народзе познату як Руску церкву зробел комплет столарию и вельки дзвери, од нємерлївей вредносци за нови ґенерациї.

На дзверох цегелка на хторей написане „Дюра Бережнї, Русин – даровал своєй церкви“.

И нєшка зоз 88 роки Дюра нє виходзи зоз роботнї – гвари його дзивка Таня.

Ученїки майстра Чуздия (Дюра Бережнї означени зоз смужку)

Найчастейши мена у фамелиї Иван, Василь, Митар, Дюра, Анкица, а у новши часи Драґан , Зоран, Весна , Наташа, Тияна, Андрей и Исидора.

Дзецинство старшей ґенерациї було претарговане зоз прициском живота, дзеци одходзели на швидки и хасновити ремесла, же би на швидши способ мали хлєб у рукох. Зоз печеньом палєнки и квалитетним пчоларством занїмаю ше як хобийом по нєшка.

Митар Бережнї купує свой маєток у Старей Бинґули и занїма ше зоз пчоларством и продукцию овоци у чим го нашлїдзує син Зоран.

По свою першу кошнїцу Митар пошол на бициґли до Мартинцох, на пол драги плєцена кошнїца му виспадла, пукла и рой ше розбег, та Митар мушел ознова влапац рой- приповеда нам його унука Тияна.

У фамелиї славели именїни, швето на дзень святого чийо мено славенїк ноши, потим Крачун и Вельку Ноц.

Од традиционалних руских єдлох зачувани по нєшка Сирец, сир з вайцох характеристични за вельконоцни стол Руснацох.

Од прошлосци по нєшка у тей фамелиї моцни дух заєднїцтва.

Єдни другима помагали при вибудови хижи, чуваня дзецох, на забивачкох и шицких роботох.

Зоз другима народами у Митровици жили у миру, злоги и вельким почитованьом.

Попри своїх ремеслох тримали и статок и живину за потреби обисца.

Жени ше старали о обисцу и дзецох и занїмали ше зоз ручнима роботами, окреме шицом и виробок ґобленох, покля ше хлопи старали за економску и финансийну стабилносц обисца.

Воспитанє дзецох було строге и правичне. Дзеци рано у дзетинстве учени робиц и спонукани буц вредни и поштени.

Митар Бережнї гуторел: „Зоз чистима руками справяй“, здогадує ше його унука Тияна.

Старши франтую зоз младшима же у їх час слово депресия нє исновало и нє було часу за ню.

Перши ґенерациї були познати ремесельнїки, столаре, тапетари и землєдїлци, а штварта и пията ґенерация фамелиї, шицки здобули високе образованє та су правнїки, медицински роботнїки, дипломовани инженєри еколоґиї, композиторе, психолоґи и лоґопеди и успешнї поднїмаче.

Драґан Бережнї перши анестетичар у сримскомитровацким шпиталю, а Зоран Бережнї длугорочни директор Републичного фонда за пензийне и инвалидне осиґуранє.

Столарию Дюри Бережнїя, сновану 1958. року у априлу мешацу, водзи дзивка Наташа Бережнї Тюк, дзе у собственим власнїцтве маю пилярню, сушарню, та линию машинох за оштренє пилкох и комплетни прибор од 40 озбильни столарски машини.

Продукую драбини, кухнї, хижи за спанє, дзвери, єдальнї и паркети, и мебель на фалат.

Свою дїялносц приведли до найвисшого уровня.

Єдна з найстарших хижох на Житному тарґовищу, з конца XVIII вику, єдна з од три зачувани здания зоз „нирнбержзким забатом“.

Стредком осамдзешатих рокох XX вику постава власнїцтво Дюри Бережнїя, дїлови простор за продай дробних продуктох своєй роботнї под назву „Кедар“, после родичох роботу пребера дзивка Таня Бережнї Стиячич. Зоз свою поднїмацосцу од роботнї прави митровацки бренд, покля як вона гутори, єй диплома Лесарского факултета остава у фийовки.

Петар Бережнї кед копал у своїм дворе 1980. року викопал вельки фалат каменя, хтори на концу мушели виберац зоз вельким краном.

Петар Бережнї коло Слунковей годзини. Лапидариюм Сримска Митровица

Открило ше познєйше же у питаню була „Слункова годзина“, з края першого вику, чежка два тони.

Петар тото приявел, та ше тото дїло од нєпреценївей вредносци нєшка находзи у Лапидариюму Музея Сриму и осликує нам историю царского городу Сирмиюм, єден з престонїцох Римского царства, нешкайшей Сримскей Митровици.

История „Слунковей годзини“ нам гутори о старей латинскей патрицийскей фамелиї Папиє, хтора жадала овиковичиц Сирмиюм и свою славну фамелию.

Дїло з мрамору зоз Брачу представя Атласа хтори на хрибце ноши слункову (нєбески звод), а за його хрибтом брацу Геркула и Ификла.

Предки фамелиї Бережнї спочиваю на руским и новим теметове у Сримскей Митровици, а потомки Ивана Бережнїя зоз Галициї нєшка жию у Сербиї, Портуґалиї и Нємецкей.

Зоз свою роботу и дружтвеним доприношеньом, сримски Бережнї постали нєоддзелїва часц городу Сримска Митровица.

Владимир Балащак

*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.

Nema još komentara.

Budite prvi koji ćete ostaviti komentar.

Odgovori

Your email address will not be published. Required fields are marked *


*

Skip to toolbar