У здогадованю членох сримских Руснацох фамелиї Беднар, урезана приповедка о малим валалу Ґерлахову под Ґерлаховским Штитом (найвисшим верху Татрох), велького горского ланца Карпатох.
Тото место находзи ше у Бардийовским дистрикту у Пряшовским реґиону у терашнєй Словацкей.
По историйних податкох по перши раз ше спомина ище давного 1326. року.
Историйно, под уплївом рижних политикох, вельочисленима освойочовами и меняня державох тот идиличне место меняло свою назву та ше так спомина:
1773 Ґерлацхфалва, Ґерлацхфалу, Ґеґерсторф, 1786 Ґерлсдорф, Ґерлацхфалва, 1808 Ґерлацхфалва, Ґерелсдорф, Ґерлацховце, 1863, 1892–1902 Ґерлацхфалу, 1873 Ґерлакфалу, 1877–1882 Ґерлахфалу, 1888 Ґерлафалу, 1907–1913 Ґерлахфалва, 1920 Ґерлацхов, 1927– Ґерлацхов.
Идилични крайолик Ґерлахова прадїдовщина фамелиї Беднар, хтора ше у цеку селїдби Руснацох змесцела першебутно у околїску, а потум у городу Митровици.
Перши Беднарово хтори ше приселєли у XIX вику були Берта Беднар зоз супругу Параскеву. Їх гроби єдни з найстарших на Руским теметове у Сримскей Митровици.
Перши приселєнєц бул Берта, завжал по приселєню жем у терашньому населєню Шалабара у Сримскей Митровици.
Зоз вецейтижньову селїдбу зоз горнєй часци царства до долнєй, воздлуж цалей тедишнєй Австроугорскей монархиї, зоз древеним кочом зоз запрагнутима двома волами, на схили Фрушкей Гори приходзи подшвидко и Янко Беднар народзени 1835. року. Кратко ше затримал у околїску валала Шишатовац, робел валалски роботи на маєтку манастира.
У своїм старим краю Янко ше занїмал зоз обробком древа и правеньом гордовох, та за ньго як вредного и пожертвованого ше робота вше могла найсц. Древодїльством предлужел ше занїмац и кед ше приселєл до Сриму.
Понеже родзина Берта и Параскева нє мали дзеци, Янко приходзи до Митровици и од нїх достава жем, та ше оженєл 05. 06. 1893. року зоз свою жемякиню Сузану Миколас (дзешка ше у матрикулох спомина и як Микола), народзену 1837. року и започали заєднїцки живот у новим стредку.
Кед подзвигли свою хижу Янко ше занїмал зоз обробком древа и жил од жеми. Роботни и упарти у керченю драги ґу лєпшому животу, постали богатши за два сина Илию и Ивана.
Кед синове одросли и були за женїдбу, оженєли их обидвох зоз Рускинями.
Илию зоз Цундра Марию (повинчани 1899. року), а Ивана зоз Ференц Юлияну (у їх малженстве нє було дзеци).
Народзели ше нови Беднарово и дзвигли їх хижи єдну попри другей.
Илия и Мария Беднар, жили од жемлєдїлства, у цеку свойого малженства добили штири сина.
Адама народзеного 1901. року, Илию народзеного 1905. року, Васу народзеного 1908. року и Милана, наймладшого сина хтори народзени рок пред законченьом Першей шветовей войни.
Розлика медзи перим и остатнїм братом була шеснац роки.
Стреднї брат Илия ше ґу наймладшому брату Милану справовал вецей як ґу роботнїкови як ґу брату, цо того приведло же би ше поносовал найстаршому и прешол до ньго до хижи. Адам Беднар дал пол маєтка свойому наймладшому брату, и зоз заєднїцкима моцами будую два Беднарово хижи на єдним маєтку, хтори исную и дзень нєшка стоя у населєню Шалабара.
Браца Беднар, припаднїки другей ґенерациї руских приселєнцох, занїмаю ше виключно зоз жемлєдїлством, а наймладши од їх Милан виучел за млїнара.
У стретаню зоз другим стредком, сербским, нємецким, горватским вицейнационлним сушедством, зоз роботу и сотруднїцтвом зоз постояцим народами, зоз мишанима малженствами, руски язик ше страцел у другей ґенерациї.
У животу другей ґенерациї, под силу приликох, шицки знали будовац и були майстри, способни и привикнути знаню даскельо роботи.
У перши час браца жили у заєднїци, же би познєйше, заєдницки ше потримовали, рушали самостойно кажди по своєй животней драги.
Мой дїдо Адам Беднар ше оженєл зоз Кату Олеар и зоз ню мал Стевана, мойого оца (народз. 1924.), Марию (народз. 1927.), Илию (народз. 1930.) и Адама (народз. 1932.) гутори нам Душан Беднар, стриц Илия мал два дзивки Божицу и Драґицу.
– Воспитанє предвойнових ґенерацийох було барз строге. Од малючка була потреба за роботу и подрозумйовало ше же ше муши робиц од малючка, голєм кармиц живину, зберац вайца и чисциц двор. Сцел нє сцел, од малючка ши учени же би бул вредни, и шорови, усадзовали ше рано роботни звикнуца, у процивним, воспитанє було зоз вареху – през шмих нам приповеда Душан Беднар.
– Мой оцец Стеван виучел за шнайдера и цали живот ше занїмал зоз шнайдерску роботу, мал и приватну праксу – додава Душан.
Стеван Беднар свойо шнайдерске ремесло учел при панї Єлени Лазич, а закончуюци испит покладал у фаховей подружней школи, дзе як школяр и шеґерт достал подзекованє за схопносц и пожертвованосц.
Свою хижу збудовал у Ратарскей улїци и постал єдан з познатихих митровацких шнайдерох. Участвовал у НОБ-у приступел ґу сримским партизанским одредом, дзе медзи иншим бул комесар и учашнїк Батинскей битки у Другей шветовей войни.
После ошлєбодзеня робел у шнайдерскей задруґи (хтора познєйше преросла до фирми “Сирмодекс”) як главни дїловодитель. Оженєл ше зоз Катицу Ференц зоз хтору у малженстве достал три сина, Душана, Владимира и Ивана.
Мой дїдо Васа, оженєл ше по судьби, бо ше смертельно залюбел до Ани Халушку, Полякинї , хтора му ше попачела. Вона пришла до тети на госцину, нє шнїла же ше ода и останє у Митровици.
– Зоз собу понєсла икону зоз Польскей хтору ше и дзень нєшка чува у фамелиї – приповеда нам Звонко Беднар.
У складним малженстве, потримуюци єдно друге, добили тройо дзеци, Дюру, Петра и Марию.
Дюра ше винчал зоз Бешенски Катарину, Петар зоз Марию Форо, а Мария ше одала за Стевана Петаковича, предлужели свой род и формовали свойо фамелиї.
Дюра (Васа) Беднар виучел шнайдерске ремесо у Нємца, майстра Филипа, хтори ше преселєл до Нємєцкей. Майстор Филип понукал Дюри же би и вон рушел, алє тот одбил, нє могол охабиц ровни Срим и свойо обисце, алє зоз майстром остал приятель завше и нащивйовали ше до конца живота.
Попри свойого шнайдерского ремесла Дюра бул и добри, самоуки гудак на гармоникци и як весели и гаризматични вше бул дзечнє видзни гармоникаш у свадзбох и на забавох. Умар од инфаркта у 58 им року живота, а иза його остала дзивка Злата Беднар.
Петар (Васе) Беднар народзени 1932. року, поживел до 2017. року. У малженстве зоз Марию Форо добил два сина, Звонка и Дарка. Занїмал ше зоз обробком жеми и пестованьом польопривредних културох. Попри того, занїмал ше и зоз винїманьом писку зоз Сави по 1967. рок. При землєдїлстве занїмал ше зоз предаваньом писку, медзи иншим и за войско за потреби митровацкей касарнї. Петар у своїх младших дньох виучел грац трубу, та грал у “ЛИМЕНЕЙ МУЗИКИ ДОБРЕДЗЕЧНОГО ОГНЬОГАСНОГО ДРУЖТВА“ у Сримскей Митровици.
Трубу грал у оркестри огньогасного дружтва од 1954. року, па по гашенє оркестри 1988. року.
Зоз своїм граньом у орхкестри участвовал 1978. року у юґослявянским партизанским филму “Стигнуц скорей швитаня” у режиї Александра Дьордєвича.
У периодзе од 1951. по 1957. рок, Петар ше зоз шестрами од стрица Илиї, Божицу и Драґицу приключел до културно просвитней роботи Руснацох у Митровици, та вєдно участвовали у єдним з перших представох на руским язику „Два малженски пари“ и „Валалски байбер“ зоз хторима обиходзели шицки места дзе жию Руснаци. Сновали секцию КПД „Йосип Цундра“, представи давали у велькей сали карчми Дюри Грабанї, же би ше познєйше приключели, як руска секция, синдикалному дружтву „Бранко Радичевич“.
Войско служел як морнар у Пули.
– 1954. року Тито путовал зоз ладю “Чайка” до дипломатскей нащиви Турскей, а Петар Беднар кажди дзень на Чайки зоз трубу оглашовал дзвиганє и спущанє юґославянскей застави. Цеком цалого свойого живота Петар се шалєл и гуторел: ”Кед я заграл зоз свою трубу, Тито стал мирно” – здогадує ше през шмих оцових словох, його син Звонко Беднар.
Владимир Балащак
*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.
Leave a Reply