У народзе позната як Руска, бо є будовали Руснаци грекокатолїки у Сримскей Митровици, Церква Вознесения Господнього грекокатолїцка церква и нащивюю є вирнїки грекокатолїки, Руснаци,...

У народзе позната як Руска, бо є будовали Руснаци грекокатолїки у Сримскей Митровици, Церква Вознесения Господнього грекокатолїцка церква и нащивюю є вирнїки грекокатолїки, Руснаци, Українци и други. Зоз приходом до Сримскей Митровици Руснаци нє мали своїх священїкох.

Парохию у Митровици основал владика кир Илия Хранилович 1886.року, а за першого пастира меновал о.Максимилияна Релїча. Рок познєйше, 1887.купена хижа и порта за церкву и парохиялни дом у Сримскей Митровици за пенєжи од преданей хижи у Велькей Писаници.

Вельки заслуги за правенє парохиялней церкви маю праве владика Хранилович и парох Релїч.

Церква подзвигнута у цеку першей децениї XX вику и пошвецена Вознесению Ґоспода Исуса Христа. О церкви хтору ше почало правиц 24.авґуста 1905.року, старал ше о.Владислав Хранилович и кед  уж було вецей як 400 вирних, прияти план од архитекти Пана Райха.

Церква закончена у априлу 1906.року, а пошвецена 1.юния истого року на Вознесениє Господа Исуса Христа. Од парохиянох за церкву дали Петар Ванчик 600 коруни, а по 100 коруни Янко Годоба, Янко Страценски, Адам Хорбаль, Янко Михалько и Илия Шучак.

Церква збудована у неоромантичним стилу. То трокорабльова будова з преддворйом, главним корабльом и двома бочнима, зоз пространу солею и крилосами, святилїщом зоз уметнїцки виробеним балдахином и иконостасом.

Церква ма три олтари: главни у святилїщу и два бочни, пошвецени Покрову и св.Антонийови Пустинякови. Пейц витражи 1906.року даровали богати жителє Сримскей Митровици, а парохови о.Владиславови Храниловичови, як знак подзековносци, парохиянє 1923.року положели памятну плочу.

Священїки хтори були на служби у Митровици: Максимилиян Релїч (1886-1902), Владислав Хранилович (1902-1923), Владимир Сеґеди (1923-1930), Илия Ґарапич (1930-1936), Илия Ванчик (1936-1949), Мирон Гирйовати (1949-1973), Стефан Питка( 1973-2003), Михайло Режак (2003-2008), Зиновий Вовк (2008-2012), и терашнї паноцец о.Владислав Варґа од 2012 року.

 Коло церкви дом хтори вєдно будовали Руснаци и Українци хтори присельовани по Другей шветовей войни з Босней и Горватскей.

Нєшка у Сримскей Митровици Руснаци у трох конфесийох, православни, грекокатолїки и римокатолїки, а у швеце их єст, назаренох,еванґелистох и будистох.

На концу, вира ствар интими каждого чловека.

Владимир Балащак

*реализацију пројекта „Руснаци зоз Войводини“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.

Nema još komentara.

Budite prvi koji ćete ostaviti komentar.

Odgovori

Your email address will not be published. Required fields are marked *


*

Skip to toolbar