У прешлосци фамелиї Мацко доминовали библийни мена Ана, Мария, Йосип, Петар, Андрей, Никола, познєйше Емил, Дюра, Янко, Павле, Мелания, Ильча, Нада, Верона, Леона, Павлина.
Йосип, зоз свою сопутнїцу Ану предлужела свою войну другей ґенерациї руских приселєнцох. Народзели му ше на вельку радосц Янко, Емил, Андрия, Павле, Мелания и Ильча.
Дзецом ше од малих ногох повторйовало „Муши ше робиц“, „Нє спричинюй зло же би ци ше нє врацело“, „Бой ше Бога“.
После нещесца першей шветовей войни, зоз хторей на щесце шицки вишли живи, алє обачлїво худобни и вистати, наставело ше далєй.
Дзеци ше воспитаваю як храбри, правдолюбиви, благочастиви, богобояжни, поштени, вредни и нєустрашиви людзе.
Помедзи два войни обробюю жем, занїмаю ше зоз статкарством.
У Мацковим обисце вше ше тримали конї и найменєй два крави, а младши учени же би любели и почитовали животинї хтори им служели же би ше викармели.
Тримали пчели и шицки файти живини, пекли палєнку, правели вино, зберали лїковити рошлїни и од коровча рошлїни Оман правели лїк за бронхитис и астму.
Костиранє першей, другей и трецей ґенерациї, були и руски традицийни, алє и рижнородни и вязани за подручє Сриму, а нови ґенерациї прилапели костиранє сучасного часу и стредок у хторим жию, аж дакеди на столєм мож найсц руски старински специялитети як цо Бобальки, Сирец та Кромплянїки и Капущанїки, як би ше здогадли духа прешлосци.
Дружтвени живот бул вязани за церкву, прадки, забивачки, мольби…
Побожни, вредни и шпоровни Йосип и Ана жили од жеми и за жем, намагали ше каждому дзецку обезпечиц занат, фалат жеми, тал за дзивки, як би им олєгчали початок самостойного живота у будучносци. Синове Янко, Емил, Андрия одслужели войско Кральовини Югославиї и оценени як храбри, послуховни, пожертвовани и поуздани вояци.
После войска синове закончели тесарски и столарски ремесла и постали познати ремесельнїки и власнїки майсторского писма.
– Цо задумам з древа направим – часто гуторел Андрия Мацко.
Браца Мацко, Емил, Андрия и Янко у мирних рокох помедзи два войни мали кажди свойого коня и часто були нащивителє рускох забавох и прадкох по Сриме и Славониї. Забави отримовани по приватних обисцох од Бачинцох, Шиду, Беркасова, Бикич Долу, Петровцох, Миклушевцох и Вуковару…
Жило се помали и шицко ше сцигло.
На тих забавох попри вельо писнї, музики и любованя кажди з нїх упознал младу и красну дзивку, а мудрим и схопним родичом нїч нє премакло, та е, як у стари час було обичай, зберали вєдно зоз тетами и стринами, на кочох путовали до Миклушевцох и Бачинцох та ше за синох опитали дзивки.
За Андрия питана Єлена Провчи зоз Миклушевцох, за Емила єй пайташка Ирина Кочиш зоз истого валалу, а за Янка Цецилия Бобаль зоз Беркасова.
Догварени свадзби и малженства и фамелия Мацко постала богатша за три млади нєвести. Даскельо роки жили у заєднїци у хторей ше слихал Йосип як глава хижи, а кажде од малдших мало свойо задлуженя, хлопи коло коньох, чежких роботох на полю, статку, а жени слухали швекру и були задлужени коло роботи у обисцу, вареня єдла, отримованя хижи, статку, карменя живини, рихтаню .имнїци и чуваня єдла за жиму (без фрижидера), месо ше пекло и залївало зоз масцу и осталих роботох у хижи.
Кад наступи жима и законча ше роботи на полю, прехозело ше на шице, гекланє, тканє, вишиванє…
Постелїна, заглавки, облєчиво, партки, ручнїки ткани и вишивани зоз сримско-рускима мотивами шицко то створели вредни руки женох Мацковей фамилиї.
Хлопи и жени за поняце терашньосци мали по даскельо ремесла, єден за лєто, други за жиму. Учели и дресовали коньох од гача на команду и упрягали до транспорту, знали попри своїх ремеслох и обрабяц жем, реюац статок, буц месаре, сушиц месо и правиц з нїх. Зоз своїма руками створели шицко цо им у живоце требало.
Паралелно зоз заєднїцким животом, з помоцу мольбох хтори були нєвидвоююца часц людзох того часу, Мацково синове будую себе хижи и виходза зоз заєднїци.
Хлопи були глава хижи, а жени шия и у крочай их провадзели и потримовали.
Жени зоз фамелиї Мацко були „мацери храбросци“. Народзели, кармели дзеци, робели у хижи, коло обисца, у полю. Хижи були на їх плєцох хтори знали витримац и їк вибраних, хтори дакеди под чежкосцу живота, войнох и биткох, знал спашенє пренайсц у погаре вина. Витримали вони и то.
Од животних злох спашенє глєдали у полю, дзе им найлєпши приятељ була мотика и дзе свой мир находзели окружени з природу и спокойством хторе лєм вона може дац. Мукоцерпни польски роботи дакеди були єдине спашенє од бриґох и нєдоброго.
Андрия и Емил Мацко почали ше занїмац зоз винїцартвом цо була їх пасия и велька любов до конца живота.
Шорюю ше животни радосци. Андрия и Єлена народзели сина Дюру и дзивку Наду, Янко и Цецилия народзели Осифа и Владу, Емил и Ирина барз жадали сина, алє место сина народзели шейсц дзивчата: Наду, Верону, Леону, Ану, Марию, Павлину.
Од худобних миґрантох зоз схилох Карпатох, треца ґенерациз зоз вредну роботу виросла до ґаздох.
Валал Беркасово ше нє помкнул зоз схилох Фрушкей Гори, од Деспотовца по нєшка, по нїм ґажел велї войско и преходзели велї держави… Австроугорска монархия, Кральовина Сербох, Горватох и Словенцох, Кральовина Югославия, Нєзависна держава Горватска…
Кед здобули, дихали зоз полнима плюцами, народзели дзеци, подумали ше одпочинух и жиц почала Друга шветова война. Зоз снованьом Нєзависней держави Горватскей Йосипа Мацка нашло на месце општинского начальнїка, на хторе бул поставени под час Дунайскей Бановини у рамику Кральовини Югославиї. Його синове Андрия, Емил и Янко охабели жени и дзеци и придружели ше ґу сримским партизаном у Босутским лєше.
После одходу синох до партизанох Йосип достава писмо теренского активисти КПЮ за Шид, Янка Крайцара, почина зоз сотруднїцтвом зоз артизанами цо им добре пришло за видаанє и подписованє особних документох.
За фамелию Мацко найчежи животни часи були под час Другей шветовей войни
– Понеже оцец и стрицове були у партизанох, доживйовали зме части випитованя и малтретираня, под окупацию було барз чежко… Нємец придзе вежнє куру, а кед чуєме же усташи иду зоз Бапскей сцекали зме дзе хто сцигол… Була сом дзивче и раз сом ше затримала коло кравох кед наишли усташе, та ми ше нє удало сцекнуц, скрила сом ше под посцель, диханє сом застановела и знала билу хустку. Обавала сом ше же усташе увидза як швици под посцелю и пренайду ме. Жительство у Беркасове вельо у войни страдало. Єден Нємец у валалє бул добри спрам нє, здабала сом му на його дзивку хтора була дзешка далєко у Нємецкей…научел ме чишлїц до дзешец – здигадує ше Нада Мацко одата Балащак.
– Церква и вира нам були шицко. Церква була и место зазберованя и друженя и за молитву… най витримаме шицко цо нам ьивот пририхтал. Бог вше да тельо, кельо трима же можеме поднєсц, анї вецей анї менє, кед ши нє блїзко церкви, помодлї ше на побрежю рики або коло древа и нє старай ше – гуторела Верона Мацко одата Бики.
Андрия Мацко у войни је постал старии и нєустрашиви сримски борец, командант III Батальона 7. Войводянске ударней бриґади. Борел ше нєустрашиво вєдно зоз совєтскима дивизиями, прешол найвекши бої Другей шветовей войни, Батински бой, ошлободзенє Нового Саду, та чежки бої на Вировитицкому и Болманскому мостобрану, та Славониї, западному Сриму и Войводини.
Ранєтих душох и цела зоз войни ше врацели Емил и Андрия без брата Янка хтори храбро погинул за шлєбоду на сримскей ровнїни и зоз заднїим дахос скричал: „Шицко за шлєбоду, шлєбоду нї зач“, охабел за собу двойо широтих, Осифа и Владу.
Война ше закончела, людзе обновйовали свойо животи.
Послевойнови час знал буц горши на хвильки, як цо сама война.
Случованя за хтори ше нє борел: принудно гнац людзох до задруґох, одберанє маєтку и кому треба и кому нє, створйованє борцох хтори то нє з помоцу двох шведкох, створйованє такволаней “Червеней буржоазиї”, їх усельовање до цудзих квартельох и и хижох привидзи до того же дїдо Андрия Мацко покаюує свою наглу норов, нє похопел же совершенство нє иснує. Одбива борацку пензию, одликованя и споменїце завера до фийовкох и ладох, пошвецел ше жеми, обробку древа и векшину свойого часу пропровадзує у своєй винїци, хтора була його рай на Фрушкей Гори до конца живота.
“Човек нательо добар же би справел рай, и нательо зли же би справел пекло”, здогадує ше дїдо Андрийових словох унук Мирослав.
Живот другей и трецей ґенерациї фамелиї Мацко бул вязани за жем.
– Польо було и наше морйо и факултет – ґуторели Мацково.
Облєкали ше по руски, старши жени су вязали хусточки “по руски” як би то вони гуторели.
Зоз радосцу ше чекало родзенє дзецка, свадзба и курбай.
За свадзбу ше мешацами пририхтовало, ткали и вишивали ручнїки, дарунки, шило ше нове облєчиво.
Хижи ше билєли пред Вельку ноц звонка и знука, а кирбай на святого Арханґела Михайла у Беркасове ше чекало з вельку нєсцерплївосцу.
Рихтало ше и мишело днями, колачи з хторих було 10 файти тримали ше у преднєй хижи и лєдво ше чекало же би пришли госци з далєка и фамелия з хтору ше ридко зиходзело.
Предки фамелиї Мацко спочиваю на руским теметове у Беркасове.
Припаднїци новших ґенерацийох фамелиї Мацко, вияшнюю ше як Руснаци часточно бешедую по руски, припаднїки су грекокатолїцкей и православней вири.
Мена новших ґенерацийох: Владимир, Борислав, Веронка, Иґор, Наташа, Милена, Боян, Весна, Ясна, Нада, Татяна….
Жию у Шидзе, Беркасове, Бачинцох, Беоґрадзе, Латярку, Новим Садзе, Вуковару, Слатини, Нємецкєй, Зєдинєних Державох, Енґлескей, Норвежскей и Австралиї.
– Любела сом живот гоч як бул чежки, заш бул преплєцени зоз красним, веселим и смутним стварами, як и у шицких. Любела сом патриц тот швет, красни є – гуторела Нада Мацко одата Балащак, пред сам край свойого живота.
Владимир Балащак
*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.
Leave a Reply