Фамелия Беднар: Охабяю окремни печац дзе ґод жию и робя (2)

Дзециньство и рана младосц предвойновей ґенерациї були скромни, роботни и єдноставни.

Жило ше зоз шест гольти жеми и за потреби собственого обисца ховали крави и швинї, кармели буяки, цо було достаточне за прикладни и поштени живот. Едзенє було рижнородне и подрозумйовало же ше состої од гевтого цо ше продукує зоз власнима руками.

За старши ґенерациї права присмачка була єдло “БАБИ”, односно шницли од натартей кромплї, пражени на горуцей масци.

Жени буле пошвецени хижи, обисцу и дзецом, штрикале трикови, шали, шапки.

– Дакеди ше трикови нє куповали, єдло ше цо сам продукуєш и ношиш триков хтори ци мама виплєтла – приповеда Звонко Беднар.

Хованє статку у фамелиї Беднар престало зоз будованьом населєня “Сиверно од Планинскей”, односно зоз урбанизацию и ширеньом городского подручя, односно зоз трансформацию превосходно валалских характеристикох того подручя до городского.

Од шветох Беднарово преславйовали Крачун, Вельку Ноц, а тиж ше означовали и имени днї.

Єдино треца ґенерация славела Кирбай митровацких Руснацох, хтори пада на Спасовдан.

Новши ґенерациї нє укаюовали ше як веьки вирни, алє ше вше зоз роботу и приходами одволовали, кед требало церкву пооправяц, або будовац церковни дом.

Дружтвени живот трецей ґенерациї бул єдноставни и вигодни за час у хторим жили. Памета ше матине забави зоз живу музику, бокс мечи и преслави Нових рокох, а векшина тих случованьох и активносцох отримана у Дому Синдиката у Митровици, хтори звалєни концом шейдзешатих рокох прешлого вику.

Мена хтори ше дзецом давали у прешлосци була традицийни и дзепоєдно библийне: Берта, Адам, Ана, Петар, Илия, Иван, Никола, Божица, Драґица,  Мария, Янко, Васа, Милан, Дюра.

У историї фамелиї дзепоєдни мена се повторюю, нашлїдзовали ше зоз дїда на унука, та аж и зоз оца на сина.

У терашнїм чаше нє тельо присутне повторйованє мена, алє зазначени шлїдуюци: Звонко, Дарко, Душан, Владимир, Борис, Божидар, Боян, Тамара, Весна, Мая, Марко.

Члени фамелиї Беднар вияшнюю ше як Руснаци и у своєй прешлосци мали вредних столарох, землєдїлцох, шнайдерох и млїнарох.

Штварта и пията ґенерација пестовала факултетски образованих людзох и углядних фаховцох, та так юаступени шлїдуюци занїманя: стоматолоґи, правнїци, машински инженєре, дохторе, орґанизаторе, глумци, кухаре, фодбалере, дохтори електротехнїки и виглєдоваче.

Беднарово були прихильни ґу спорту, ватрени фодбалере и фодбалски навияче.

Зоз фамелиї походзи познати и нєзабути фодбалер Никола Беднар (1920-2011), хтори зоз 16 роки постал першетимец ФК „Граждански“ у Сримскей Митровици. Швидки и схопни,  замерковани з боку вельих фодбалских фаховцох, та кариєру помедзи два войни предлужел у тедишнїм ФК „Юґославия“, нешкайша „Червена Гвизда“. Лєгко освоєл публику и постал стандардни першетимец. Штампа медзи двома войнами була полна успиху и похвалох за Николу Беднара, хтори и званїчно спатрани як найшвидши фодбалер тедишнєй Кральовини Юґославиї.

У 21 вику, на полю виглєдовацкей роботи, визначни дохтор електротехнїки Никола Беднар хтори жиє у Австриї и роби на проєктох соларних проєкторох найновшей ґенерациї.

Зоз релативно малей фамелии походзи и Звонко Беднар, ґлумец и дакедишнї орґанизатор у театру „Добрица Милутинович“, хтори зоз свою  роботу охабел богати шлїд у животу театра, та и у роботи Дружтва Руснацох у Сримскей Митровици.

По законченю основней музичней школи, отац го приключел  оркестри „ДОД-а“, дзе грал кларинер, саксофон, добош и чинели. Зоз оркестру оцец и син, Петар и Звонко у Сримскей Митровици дочекали шицки Титово  штафете, шицки святочносци у городу, хованя першеборцох и грали у оркестри по єй гашенє.

Беднарово маю и трох познатих дохторох.

Др Божица Беднар Антониєвич, народзена 1941. року у Сримскей Митровици, а студиї стоматолоґиї закончела  1966. року у Беоґрадзе. Як стоматолоґ робела комплетну общу стоматолоґию. Робела у Сримскей Митровици, Лозници, Апатину и Новим Садзе, дзе роботни вик закончела як дзецински стоматолоґ.

Др Божидар Беднар народзени 1946. року у Сримскей Митровици. Лїкарску диплому здобул је 1975. року у Новим Садзе. Специялизовал за лїкара общей медицини и пензию дочекал зозроботу у Латярку.

Др Борис Беднар народзени 1979. року. Ґимназию закончел у Сримскей Митровици, а Медицински факултет и специялизацию Ортопедскей гирурґиї закончел у Новим Садзе. Жиє у Сримскей Митровици и роби у Общим шпиталю у родимим варошу.

Припаднїки фамелиї Беднар, як у прошлосци, так и нєшка, уходза до мишаних малженствох, пестую добри и чесни одношеня зоз припаднїками других нацийох, охабяю окремни печац дзе ґод жию и робя почитуюци складносц и гармонию.

Владимир Балащак

*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средствa