Дружтво Руснацох Сримска Митровица

Остатнї два децениї „Дружтво Руснацох Сримска Митровица“ забера  важне место на културней мапи Срима и городу Сримска Митровица. У своєй вецейдеценийней роботи сотрудзує зоз шицкима городскима институциями култури, а акцент на очуваню националного идентитету, обичайох, традициї и язика Руснацох у Сримскей Митровици. После павзи од скоро штири децениї „ Дружтво Руснацох“ основане 2004. року з боку руских ентузиястох и почитовательох рускей заєднїци.

Перши крочай направел Михайло Грабаня, а у тей идеї го провадзели Євґения Люботина, Нада Колесар Адамович, Яким Папуґа, Александар Ващанин, Тоша Ференц и Бранко Ходоба. Вони снователє и перши дїяче у Дружтве. За першого предсидателя вибрани Михайло Грабаня а за секретара Владимир Балащак.

28. фебруара 2007. за предсидателя вибрани Владимир Балащак а за секретара Вера Сакан. Од того часу, а зоз потримовку Заводу за културу войводянских Руснацох  и тедишнього директора Мирослава Кевеждия и тедишнього предсидателя Националного совиту  рускей националней заєднїци Славка Ороса, города Сримска Митровица, руша ше зоз интензивнєйшу роботу и реализацию конкретних програмох. Звекшує ше членство, а шицко у цилю очуваня националного идентитету, язика и култури Руснацох у Сримскей Митровици. Уж скоро асимиловани, Руснаци ше дзвигаю як феникс.

При Дружтве ше формує шпивацка ґрупа „Руски соловеї“ под дириґентску палїчку познатого оперного солисти Александра Стефана Радишевича, а познєйше, визначней музичней педаґоґинї и професорки Станислави Будишин. Драмско-рецитаторску секцию водзи Владимир Балащак а язичну секцию водзи професорка Драґана Ненадич.

 У рамикох роботи  на предклад Владимира Балащака и Вери Сакан, концом 2007. приноши ше одлуку о  снованю святочней академиї „Мацери Рускинї“ зоз котру почина означованє присельованя Руснацох на простор Сримскей Митровици.

Перша академия „Мацери Рускинї“ отримана 18.05 2008. року у сотруднїцтве шицких културних институцийох у городу и шицких секцийох Дружтва на чолє зоз Вельку  городску тамбурову орхестру под дириґентску палїчку Зорици Опачич.

Шпивацка ґрупа „Руски соловеї“ зняла ЦД компилацию „Руски соловеї сримскей ровнїни“ зоз рускима писнями и вибором найкрасших стихох, а вельке доприношенє дали оперски солиста Александар Стефан Радишевич и ґлумица Єлена Янкович котри знїмали руски скарб як би вон остал зазначени за будуци поколєня.

После того Дружтво ше першираз зявює на реномираним руским фестивалу „Червена ружа“.

Як окремне доприношенє и значна часц у уметнїцкей роботи то формованє театралней ґрупи зоз назву филмскей и театралней ґлумици Ирени Колесар,  чийо мено уткане до фундаментох югославянскей кинематоґрафиї.

По першираз, после скоро пол вика даваю ше представи на руским язику  и двоязично и зоз нїма ше обиходзи швет.

 На место секретара Дружтва 2009. року приходзи Оливера Делич, музейна совитнїца, и кладзе акцент у роботи на приблїжованє и упознаванє ширшей сримскомитровацкей  явносци зоз Руснацами и їх животом и роботу.

През иновативни и нєкаждодньови уметнїцки проєкти котри реализовала совитнїца Оливера Делич и моцну потримовку  Музея Сриму публика ше упознава зоз дакедишнїм облєчивом Руснацох. Зоз численима креативнима  роботнями котри водзела, школяре шицких митровицких основних и штреднїх школох и  гражданє упознали ше  зоз Руснацами и їх традицию и обичаями.

Єй робота на проєкту „Ружа на хусточки“ посцигла циль и  до „Дружтва Руснацох“ у вельким чишлє приходза  Серби, Горвати, Словаци, людзе зоз мишаних малженствох, жадаюци дружиц ше, участвовац у уметнїцким твореню и помогнуц Руснацом, малочисленей заєднїци же би очувала свой идентитет. За то им припада од шерца велька подзековносц.

Концом 2020. року у сотруднїцтве зоз Новинарску асоцияцию Руснацох , Држтво достава потримовку од надлєжних державних орґанох и институцийох, и  обявює кнїжку  „Ошмих порцуловей фиґурини“ своєфайтове моноґрафске виданє о драмскей  и филмскей уметнїци Ирени Колесар.

Руснаци народ котри нєма державу матичного народу. Руска заєднїца под уплївом   тирвацого процесу асимилациї, а Сербия Руснацох прилапела и братски  притулєла ґу себе.

Дзе ґод да жию и творя, їх окремна характеристика язик,  култура и уметносц, а главне ґесло „Цудзе почитовац, а свойо чуваме“, а шицко вєдно обєдинєне до любови.

 Владимир Балащак

*реализацију пројекта „Руснаци зоз Войводини“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.