Живот Руснацох на Карпатох бул барз чежки пре експлоатацию, а провадзели го бунти у XV вику, гражданска война медзи Фердинандом и Заполю, одходом до...

Живот Руснацох на Карпатох бул барз чежки пре експлоатацию, а провадзели го бунти у XV вику, гражданска война медзи Фердинандом и Заполю, одходом до войни процив Туркох, потим зоз участвованьом у Текелийовим и Ракоцийовим повстаньом (XVII и  XVII вик).

У таких обставинох Руснаци ришенє видзели у селїдби.

Чули же ше дзешка далєко на югу Угорскей може достац досц жеми безплатно и вони ше селєли перше до Бачкей, а потим до Сриму и до Славониї.

Зоз формованьом Австро-Угорскей, Руснаци зоз обидвох бокох Карпатох, та и на самим югу Угорскей жили у єдней держави по єй розпад 1918. року, кед часци рускей нациї припадли Ческей, Словацкей, Польскей, Мадярскей, Югославиї и України, дзе углавним жию и по нєшка.

Попри колонизациї Нємоха до южних крайох Габзбуржзкей монархиї, Дворска комора кончела и нукашню колонизацию, преселююци Мадярох, Словакох и Руснацох на юг.

Руснаци на Закарпатю були гнобени, а понеже мали статус селянох шлєбодней селїдби, селїдба им добре пришла у глєданю лєпшей жеми и легчейшого животу. Дворска комора по своїх висланцох, вербовала Руснацох за селїдбу до Бачкей, Керестура и Коцура, а Руснаци ше потим, зоз ширеньом и познєйшим досельованьом у другей и трецей миґрациї, приселєли до Сриму, Славониї и Босней.

Под час револуциї 1848. року и такой по револуциї, почала друга миґрация Руснацох. Они приходза зоз Маковици (зоз Бардийова и околїска)

То були Горняци и Лемки. Приходза цалком на юг до Сриму (перше до Шиду 1803. року преходзи 40 фамелиї, а познєйше и до других местох: Беркасово – 1834. року 71 особа; Бачинцох – 1836. року 103 особи; Петровцох – 1834. року 318 особи; Ґрабова и Миклушевцох – 1847. року 62 особи; Сримскей Митровици – 1854. року 119 особи).

Свадзба у Давидовей фамилиї,Мария,Митро и Ханча Давид народзена Дупаль.Беркасово

Числєнше досельованє було од 1869. по 1871. рок, Руснаци зоз Маковици населюю ше по цалей горйовитей часци Срему и менєй у нижей часци.

Теди нових жительох примела Привина Глава, Бачинци, Шид, Куковци, Куняд, (Рогаль бази), Босут, Стара Бинґула, Пиштинци, Ґрк и Сот.

Перше руске населєнє у Сриме настало у Шидзе на инициятиву Крижевскей грекокатолїцкей епископиї, хтора 1777. року од царици Мариї Терезиї достала велможски маєток Шид и Беркасово и постала феудални пан тедишньому жительству.

Так уж 1802. року подписани контракт медзи панством и делеґацию Руснацох, а уж 1803. року, Руснаци ше зоз Керестура и Коцура доселєли до Шиду и почали обробйовац достату жем.

По контракту було догварене:

1. Руснаци приму жем, окрем 200 гольти хтори панство затрима за себе.  Приму цернїска и мочарна часци хтори викерча и висуша.

Од тей жеми буду давац пиятину од урожаю и тото превежу до панских маґазинох. Од викерченїскох нє буду плациц нїч три роки.

2. Окрем пиятини од урожаю, од каждого гольта буду плациц панству у пенєжу єден форинт рочнє.

3. Инквилини буду плациц таксу 3 форинти  и 24 ґрайцари або место часци пенєжу, кед то жада панство буду давац 18 роботи рочнє.

4. Воларох, кочияшох и алодиялних чуварох панство будзе плациц як то узвичаєне у Сримскей жупаниї.

5. Додзелї ше им жем за пестованє винїцох и шлївнїкох, од хторих буду давац дзешатину.

6. Древо за будованє хижох, гоч ше з тим прави чкода у лєсох, панство им да безплатно.

Владимир Балащак

(Хаснована литература „Беркасово од Деспотовца по нєшка“ Леона и Владимир Гайдук)

*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.

Nema još komentara.

Budite prvi koji ćete ostaviti komentar.

Odgovori

Your email address will not be published. Required fields are marked *


*

Skip to toolbar