Свой нови дом и лєпши живот у Сриме, точнєйше у Сримскей Митровици нашли и члени велькех фамелиї Ференц-Андриєвич-Андреєвич.
Зоз сиверу царства из далєкей южней Галициї прейґ Бескидох, на драгу нєизвесного рушели двоме власни браца Александар и Алексей 1846. року, презвиска Ференц, мадяризованого у цеку селїдби.
У ceку вецеймешачней и трапезней селїдби, Алексею ше траци кажди шлїд, а до обецаней жеми, на крайнї юг Габзбуржзкей монархиї стигол Александар сам, зоз нєполни петнац роки.
Путовал пешо зоз Карпатох, прейґ угорскей ровнїни, кармел ше у драги зоз вредну и схопну роботу, занїмал ше зоз обробком древа, правел и предавал судзину з древа: судзину за правенє, ложки, варехи, миски, древени конїки..
Зоз приходом до сримскей ровнїни шлєпо ше залюбел до дзивки ґрофовского походзеня и упрекосц процивеню єй фамелиї и шицким намаганїом же би ше їх любов зопарла и нєдошлєбодзела, ґрофица, слухала свойо шерцо и водзена зоз емоциями, одходзи за младого и красного Александра, страцела титулу и шицки удобносци живота та пре любов церпи одреканє од родичох.
Їх безгранїчна любов крунована зо штверо дзеци: Анастасию, Марию, Параскеву и Иваном.
Щесце було краткого вика…даскельо роки познєйше, супруга му умера и млади Александар зоз штверо мали дзеци остава сам.
Под чежину и терху самохраного оца, даскельо роки познєйше оженєл ґрофовицову служкиню, Рускиню Гелену Колтко, хтора и сама була ґдовица зоз малим сином.
Удружели ше єдно з другим, та зоз трапезу и зоз животнима радосцами, предлужели живот вєдно и добили тройо дзеци: Андрия, Юстину и Єфросу.
Даскельо роки познєйше, Геленов син зоз першого малженства оженєл ше зоз першу дзивку ґрофици и Александра Ференца, Анастасию.
Були то децениї, кед чежки часи, були преплєтани зоз вельо любови у тей фамелиї, цо им давало моц исц напредок и анї крочай назадок.
Прилапени у новим краю, Митровицу прилапели як свой варош.
ТУ ше народзели, женєли, одавали, умерали…
Найстаршому Александровому сину Андрию Ференцу за око западла млада Юлка Лазор зоз Старей Бинґули. Барз млади ше побрали.
Одзелюю ше зоз фамелийней заєднїци, будую себе хижу и населюю ше на перифериї тедишнєй Митровици, у терашнїм населєню Шалабара.
Занїмаю ше зоз польопривреду и статкарством.
Їх живот обогацени зоз пецеро дзеци: Илию, Петром, Катицу, Филипом и Любицу.
Случую ше нагоди, яки лєм живот, як писатель найлєпших драмох може написац.
Нацагую ше войново хмари, Андрий присилно мобилизовани до австроугорского войска и послати на восточни фронт до Русиї, за собу охабя младу супругу же би ше сама старала о малих дзецох, швекрови и швекри и цалому обисцу.
Вязаносц за церкву и вира младей жени Юлки, та молитви хтори унапрямовала за свойого Андрия, були єй потримовка и жридло моци, як би витримала до його врацаня зоз войни, хторе було нєизвесне.
У єдней з велїх борбох Андрий бул ранєти до ноги, и у мишанїни австроугорских воякох, розличних нацийох, бул охабени на фронту на милосц и нємилосц и пада до русийского зарабенїцтва.
Руски язик, помогнул му же би ша зоз Русами добре спорозумел и то доведло до того же му у зарабенїцтве було лєпше як у войску зєдинєней монархиї – тєердзи його праунука Ивана Миросавлєвич.
Привидно окрипени пущени зоз зарабенїцтва врацел ше до своєй Митровици…
Нє зацекол родичох…… товарише зоз хторима одроснул одселєли ше до Америки…
Зламани од вистатосци и вистати зоз войну, войованьом, жиму и далєким путованьом Андрий Ференц непоштредно по приходу, достава ґанґрену и напуща тот швет.
Вельо познєйше, зоз пиєтету ґу оцови Андрию Ференцу, його синове пременєли презвиска по його мену, так Илия бере презвиско Андреєвич,а Филип Андриєвић, Петар остава Ференц його потомки по нєшка наша тото презвиско.
Владимир Балащак
*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.
Leave a Reply