Фамелия Еделински: Шицко цо зме записане у здогадованю (1)

Зоз бешеди Зденки Давидович, народзеней Еделински и єй дзивки Наташи, дознало ше же ше прапредки фамелиї Еделински доселили зоз околїска мадярского городу Еделинь, та ше предпоставя же ноша презвиско по подручю городу на хторим дакеди жили.

До Сриму пришли перше до Привиней Глави, же би ше перши потомки хтори запаметани Йосиф и Ана Еделински (по походзеню зоз Миклушевцох) початком 30 тих рокох прешлого вика населєли до Бачинцох зоз сином Йоакимом народзеним 04. 08. 1923. року и дакус младшим Янком.

За живота Йоакима Еделинского, фамелия достала назвиско Бруґошово, хтори ноша по нєшка, та ше вше зоз споминаньом наювиска знало о хторей фамелиї слово.

Йоакимова фамелия Еделински, после Другей шветовей войни зоз Сриму одходзи далєй до Арґентини и нїґда ше вецей нє врацели. Старши ше лєм здогадую, як якаш родзина дїда Йоакима зоз Арґентини, послала у пакету нове облєчиво, а познєйше ше фамилийни одношеня цалком претаргли, цо пре далєкосц, а познєйше и язична бариєра.

Йоаким ше оженєл досц млади зоз Веруну Лацко, народзену 17. 02. 1924. року.

Обидвойо у тедишнї час мало закончену штирирочну школу у Бачинцох.

У войнових обставинох Йоаким зарабени и одведзени до нємєцкого зарабенїцтва до роботного лаґру зоз хторого ше враца после ошлєбодзеня.

Бачински Бруґошово ше вше вияшньовали як Руснаци грекокатолїки, а старши ґенерациї бешедовали и по руски и по сербски. Руски у хижи, медзи собу, зоз фамелию и другима Руснацами, а сербски зоз сушедами.

Свою дзивку, Зденку Еделински, одато Давидович, Йоаким и Веруна добили 22. 01. 1952. року,  у єденастим року малженства, як осме дзецко, хторе єдине прежило.

Мена хтори ше у прошлосци зявйовали у фамелиї: Йосиф, Ана, Веруна, Фебруна, Гелена, Янко, Маґда, Серафина, Марча, Ирина, Иринка, Ярослав, Мирослав, Нестор, Мирон, Мартица, Йоаким.

Мена новших ґенерацийох и потомкох: Зденка, Звонко, Невенка, Єлка, Сенка, Таня, Саня, Наташа, Воїслав, Драґан.

Повторйованє мена з колєна на колєно було ридке, углавним давали модерни мена у складзе зоз часом и моду.

Ремесла предкох були: землєдїлци, статкаре, винїцаре, лимаре, правнїки, а у новши час зявюю ше економисти, аґрономи, тарґовци и ґлумци.

Девојчице Еделински

Старши ґенерациї винчали ше досц млади, зоз 16-17 роки., а зоз 19 роки уж були спатрани як старши леґинє и дзивки.

Їх дружтвени живот бул засновани на прадкох, мольбох и танцох, хтори ше у тим чаше правели по обисцох и то у преднїх хижох.

Познати забави правела и орґанизовала Зденкова баба з мацерового боку, Фебруна Лацко, народзена Чижмар, хтора плацала гудацом же би грали и возвешельовали младих.

Млади дзивки за тоту подїю правели красни и компликовани фризури, та ноц пред забаву спали, односно вецей дримали, нагнути зоз чолом на стол, же би фризуру не почубели.

Дзивки на танєц нє ишли сами, алє их провадзели найменєй два тети, хтори були задлужени мерковац на пристойносц и морал.

Як орґанизатор забави, Фебруна була позната и по своєй схопносци билєня зоз фарбу до хторей уруцовала млєко, а смужку вицаговала з волну, та ю пре свою способносц и добру роботу часто глєдали у валалє и околїску.

У цеку Другей шветовай войни, през Бачинци преходзело розличне и кажде од фамелиї под прициском глєдало преднї хижи за змесценє воякох.

У кризним периодзе после ошлєбодзеня кед держава брала од парастох, не питаюци ше чи му остава достаточно же би ше прекармел, Фебрунова знаходлївосц и способносц показали ше як драгоцийни. Вона теда паковала канту масци хтору скривала под широку и длугоку руску сукню и шверцовала до Београду путуюци на айзибану. У престолним варошу масц предавала и куповала потребне цо єй у обисце хибело – здогадує ше бабових дожицох унука Зденка.

Старши ґенерациї буле барз побожни и боголюбиви, були вельки вирнїки, хтори любели и почитовали Руску церкву святого Луки у Бачинцох. Посцело ше стреду и пияток.

Жени и дзивки окреме водзели рахунок кед ше ишло до церкви, же би ше було поприберани, же би у рукох була била, чиста и закрохмалєна хусочка, а кед ше руши, же би ше у заградки набрало квеца хторе ше тримло у рукох у цеку Служби Божей.

Жени ше тиж дзечнє одволовали и намагали кед требало помагац у зредзованю церкви и єй пораєню, окреме пред важнєйши швета.

Приповеда нам Наташа Давидович, як єй баба и дїдо мали свой столок у церкви, хтори плацели житом або зоз кукурицу як роковину на рочним уровню.

У януару за Богоявлєниє  швецела ше вода и тото ше окончовало у намесценей “як слика” преднєй хижи.

Вчас рано чекал ше священїк. Шицки ше облєкали святочно и бриґовали ше, кед би паноцец случайно пожнєл. Викуковало ше на улїцу, же би ше видзело дзе паноцец заостал, а кед би ше видзело як идзе зоз своїма двома помоцнїками шицкима би було легчейше и приступело би ше ґу дїї пошвеценя води.

На столє, хтори бул прекрити зоз закрохмалєним билим партком, була миска зоз воду, потим танєр зоз пасулю у зарну, два вайца и пенєж за роковину и надополнєє за дїю.

Меньше количество пенєжу ше двоєло и священїковим помоцнїком хтори му помагали.

На Вельки пияток ше посцело и пукало ше пуканки, а за Вельку ноц ше ношела кошарка на пошвеценє, а у нєй були Пасха (обредни хлєб), варена шунка, колбаса, сирец, млада цибуля, и писанки.

За Вельку ноц, жени зоз фамелиї Еделински з вельку педантносцу рихтали “писанки”, вайца фарбени на типично руски способ зоз воском.

За Вилїю дзеци винчовали “Я мали дзиячок, шпивам яґод тащок, тащки шпиваю, Боха витаю, я Вас витам, динари питам, динари ми дайце, здрави оставайце”, та дзеци даровани, дарунками и пенєжом.

Рихтало ше руски єдла бобальки, капущанїки и потька на ризкаши, а на столє мушели буц сухи шлївки, дробни пенєж и палєло ше швичку, хтора стала у судзини заджобнута до кукурици.

Вочи святого Миколая дзеци до облакох кладли чижми, хтори би ютре були полни дарункох, зоз обовязну теку-свезку и оловку.

Владимир Балащак

*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.

Be the first to comment

Leave a Reply

Your email address will not be published.


*