Фамелия Гладик: „Богатство рижнородносци“ (2)

Треца ґенерация фамелиї Гладик були познати ремесельнїки. Мали у власносци ремесельнїцки писма.

У прошлосци фамелиї Гладик, у другей и трецей ґенерациї преовладзую шлїдуюци занїманя: роботнїки, металоструґаре, млїнаре, клянкаре, ґаздинї, тарґовци, землєдїлци, кочиши, службенїки.

При припаднїкох штвартей и пиятей ґенерациї ремесла ше траца, пята ґенерация ше школує у иножемстве, шицки имаю закончени стреднї школи, те у фамелиї заступени шлїдуюци занїмања: медицински роботнїки, професоре шпанского язика, професоре математики зоз докторатом, еколоґи и физиятри.

Фамелия Гладик ше асимиловала такой по  приселєню на простор Митровици зоз домициялним жительством. Постали подобни доминантному идентитету окруженя до хторого пришли. Нови стредок, нове жительство, нови язик, мишани малженства доведли до нового богатства и оплеменьованя рижнородносцу, алє и до траценя руского язика уж у другей ґенерациї. Язик ше страцел, але  чувство же су Руснаци ше нє страцело по нєшка.

Зоз историї руских народних новинох „Руске слово“, дознаваме же Андрия Гладик 1945. року бул єдан з дзеведзешат и єдного предплатнїка и дародавцох зоз Митровици, а за „Фонд Руского слова“, зоз пейц тедишнї динари.

-Дзецох у прошлосци було вельо и рано мушели почац зоз осамоставйованьом и заробиц свой хлєб. Воспитани же би почитовали старших, же су добри, фини и послуховни. Дїдо Андрия мал вельку заграду и шицко цо прокудовал предавал на пияцу у Митровици, понеже тримал конї, занїмал ше и зоз превозку. Кармени швинї за потреби обисца, а єдло було гевто цо ше зоз своїма руками продукує.

Тераз уж давного 1965. року, паметам же дїдо водзел конї на Саву же би их окупал, цо за нас дзеци було праве дожице – памета унук Душко Гладик.

Од шветох у фамелиї Гладик означовали ше Велька ноц и Крачун, слама ше уношела до обисца, а у окремним здогадованю унука оставаю урезани Крачуни и дїда Андрия. Часи ше меняли, с часом и власц.

Оцец уж бул комуниста и ґенерално хлопи трецей ґенерациї нє були вельки вирнїки, алє ше почитовали шицки релиґиї. Углавним ше вецей почитовали державни, як вирски швета.

Вири вецей прихильни були жени фамелиї Гладик, баба за кажде вирске швето направела лєпши полудзенок, же би означела вирске швето або святого хтори бул на тот дзень. – здогадує ше Душко Гладик.

Треца ґенерация фамелиї, будовала хижи на мольби и собственима моцами и трудом, як хто могол. Єдзенє було рижнородне и состояло ше зоз желєняви и цеста хторе жени правели ручно у своїх обисцох. (ґомбовци, шуфнудли, ташки).

Жени вельо штрикали и занїмали ше зоз ручнима роботами, облєканє було у складзе зоз часом и стредком у хторим жили и любели ношиц гевто у чим ше чувствую комотно.

Штврта ґенерация фамелиї Гладик народзена и одросла у Социялистичней Федеративней Републики Югославиї.

Дзецинство нам було прекрасне и байковите, одросли зме у стредку и зоз сушедством хторе було вецейнационалне, а и сама наша фамелия була мишана, дружели зме ше зоз шицкима. – гутори нам Миряна Панджич.

Виходи до ЗКС, Омладинского дому и паметаю познати зазберованя на “Маймунцу” (Городска площа), скорей и после школи.

Нєдзеля була резервована за нєдзельни полудзенок и за друженє зоз фамелию.

Гевто цо пиха, велїчина и велько богатство тей фамелиї мишани малженства, на хтори вони пишни и то зоз вельким правом, бо правдива любов, нє зна за гранїци, за виру, або нацию.

-Кед би Тито бул живи, нє розплєт би нас и розмервел – у шмиху гутори супруга Душка Гладика, Светлана. У чаше СФРЮ ше нє патрело хто хто, анї зме нє знали, на то нїхто нє обрацал увагу, ми нє обрацаме анї нєшка, главне же ши чловек – додаа Светлана Гладик.

При тей веселей, питомей и миролюбивей фамелиї велького шерца и вельких и вельочислених пацифистох, толеранция на барз високим уровню.

Гваря же за их ґларя же су спомалшени, же маю кеди, алє же шицко сцигую.

Попри толеранциї, хтора ше у фамелиї пестовала децениями, присутни и моцни, од прешлосци по нєшка, дух заєднїцтва.

Понеже Андрия Гладик нє мал пензию, шицки його синове го без пригварки до конца живота витримовали – здогадує ше Душко.

Мена у прошлосци заступени у фамелиї: Янко, Андрия, Митар, Ана, Петар, Йован, Павле, Дюра.

Мена дакеди додзельовани и давани по предкох, та ше мена Андрия, Павле и Дюра даскельо раз повторюю.

Мена новших ґенарацийох у фамелиї: Душан, Душица, Миряна, Мая, Амира, Предраґ, Иван, Мирослав, Стеван, Павле, Ива, Наташа…

Руснаци у Сримскей Митровици типични по тим, же ше мишали и родзели зоз другима рускима фамелиями. Гевто цо окремне за фамелию Гладик то, же ше под уплївом околносцох нє мишали и уходзели до малженства зоз другима митровацкима Руснацами.

Предки фамелиї Гладик спочиваю на Руским и Новим теметове у Сримскей Митровици, а потомки Гладик Янка зоз Питрова зоз далєких Карпатох нєшка жию у Сербиї, Горватскей, Австрији, Швайцарскей и Нємецкей.

Мото Гладикових бул шор, робота и дисциплина.

Розположени, приступачни, отвореного шерца, красних славянских смушкох и ище лєпших и богатших дущох таки Гладиково и нєшка!

Владимир Балащак

*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.