Идилични валалчок мена Петрова (по преданю мено достало по святому Петру) населєне место зоз административним статусом валалскей општини у округу Бардейов у Пряшовским краю у Шаришу. Находзи ше на крайнєй сиверовосточней часци нєшкайшей Словацкей. През бурйовити историйни случаованя меняло свою назву та ше так 1773. спомина як Петрова, 1786. як Питрова, 1808. Петров, Пиетрова и Питрова, 1907-1913. Вегпетри, 1946-1965. Петрова, Питрова, же би ше од 1973. по нєшка затримала назва Петрова.
Праве зоз тих карпатскогих горох и їх схилох рушали ше найвекши селїдби Руснацох до Америки и до Панониї.
По зачуваних найстарших податкох зоз водзеня церковних матрикулох показую же место Петрова родзене место и колїска сримскей фамелиї Гладик.
Перши Гладик у церковних матрикулох зоз 1715. року у Питрови ше спомина як Йоанес Гладик.
През историю, Руснаци презвиска Гладик миґровали до Америки и єден конар фамелиї свой нови дом пренашол зоз досельованьом до Сриму, точнєйше до Сримскей Митровици.
У чаше кед Австроугорска була у вершини будованя желєзних драгох у рамикох своїх вельких гранїцох, за лєпшим животом и плодну жему рушели ше на далєку драгу двоме браца Гладик.О Охабели свою родзину, людзох по презвиску, напущели свой родими край и любену Питрову єден брат одходзи до Америки, а други Янко Гладик на волох и коньох после трапезней драги хтора тирвала мешацами сцогол до Митровици.
По памяткох найстарших припаднїкох фамелиї, двоме браца по розихидзеню ше нїґда вецей нє стретли и по снованю нового живота у новим краю царства, шицки вязи зоз старим крайом претаргнути.
По приходу до Митровици, як добри роботнїк Янко Гладик ше такой знашол, нє виберал роботу хтору будзе окончовац, робел у богатих ґаздох на салашох у околїски Митровици.
Млади и роботни, дзелєл добре и зле зоз свою супругу, живот му постава богатши зоз дзецми. Мал их тройо. Анку, Андрия и Митра.
Як барз роботни, по здогадованю потомкох, Янко ше швидко осамосталєл, купує фалат жеми и з помоцу мольбох прави хижу за свою фамелию на простору дакедишнєй улїци Отокара Кершования у Митровици.
Анка ше одала до Заґребу, Андрия Гладик ше оженєл скорей Першей шветовей войни, у першим малженстве нє мал дзеци, поприходу зоз войни оженєл ґдовицу Марицу Кминяк зоз Батровцох, а Митро Гладик нє мал дзеци.
– Мой дїдо любел и тримал конї, здобул дацо жеми и то му було достаточне за пристойни живот – гутори Миряна Панджич, унука Андриї Гладика.
Його младосц и младосц його брацох и шестри преходзела у швидкому осамостальованю. Андрия Гладик мал штири сина и єдну дзивку. Ану, Петра, Йову, Павла и Дюру. Дзециньство им преходзело у роботи и нє мали кеди уживац у дзециньстве. Млади леґинє закончели ремесла хтори у гевтим чаше були потребни, глєдани и ценєни.
– Мой оцец Петар бул металоструґар и попри ремесла закончел тарґовинску школу, як млади спаднул до нємецкого зарабенїцтво у варошу Дрезден. Под сплєтом щешлївих и судьбинских околносцох остал живи, тамо научел грац прим, любел биоскоп, театер и ґимнастику. Кед ґод мал часу и можлївосци нащивйовал културни и спортски манифестациї и случованя, у тим сом подполно на ньго – гутори Миряна.
– Тета Ана була парасткиня, одала ше за Тордая хтори на жаль нєстал у лаґрох, мала зоз нїм два сина. Стриц Дюра бул млїнар, а стриц Павле закончел за клянкара, алє вше мал жаданє за ученьом та ше познєйше дошколовйовал – визначела Миряна.
– Петар Гладик, мой стриц бул познати майстор и робел у тедишнєй новооснованей “Аґро нашенє”. Мал єдну з перших бициґлох у Митровици, а його пасия и любов були годзинки. Бул вельки колекционер мурових годзинох, а до Митровици после ошлєбодзеня перши догнал трактор гушенїчар – здогадує ше зоз смутком синовец Душко Гладик. Оженєл ше зоз красну Здравку зоз Д.Теранви и народзели двойо дзеци Миряну Гладик одато Панджич, по струки медицинска шестра, жиє и роби у Швайцарскей и Мирослава Гладика, будовательного инженєра хтори зоз свою фамелию жиє и роби у Суботици.
Други син Андриї Гладика, Йова, нє дзбал за школу, робел як роботнїк у “Пролетеру”. Оженєл ше зоз Розику Майор и зоз ню мал штверо дзеци Драґицу, Стевана, Анкицу и Мару. Вон єдини син хтори остай жиц у хижи свойого оца.
Павле Гладик свою животну сопутнїцу, Драґицу Анойчич вжал зоз Мандєлосу и зоз ню сновал свою фамелию. Зоз їх любови и млаженства на швет пришли Душко и Душица Гладик.
Павле як майстор клянкар, робел на Ладьобудоваїщу, алє ше зоз познєйшим дошколовйованьом стално усовершовал, та робел у тедишнєй городскей управи на роботох охрани на роботи.
Дюра Гладик оженєл Драґицу Крнии и добил два сина Павла и Стевана. Бул млїнар и робел на “Житопромету”, при силосох и збудовал себе хижу у улїци Лукуяна Мушицкого. Його син Павле селї ше до Зомбору, дзе и нєшка жиє и роби.
Владимир Балащак
*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.
Leave a Reply