Зоз Беркасова и сримских горох, просто на Маракану. Мирослав Балащак фодбал почал бавиц у своїм родним месце на питомих брегох Фрушкей Гори. Бул то час кед шицки його парняки и вон, бегали за лабду направену од рендох, бо иншаки лабди и други бависка не було.
Мирослав анї нє шнїл же го хлапцовске бависко, зоз валалского терену Ливадице, у Беркасове, одведзе просто на Маракану.
Дуле Савич и Мирослав Балащак 1980. року Сримска Митровица
У основнй школи „Филип Вишнїч” у Шиду, його наставнїк биолоґиї Спасоє Смаїч, бул источашнє и тренер младшей катеґориї ФК Раднички, и вон го перши уводзи до бависка за подросток. Першираз є реґистровани як бавяч у даяким клубу. Свою фодбалску драгу нам описує сам Мирослав:
– Нє знам цо ми було, алє я того 1969. року шицким гварел же я будзем фодбалер Червеней Гвизди.
Тедишнї тренер Радничкого, Душан Попович Тутан мойому бачикови Мацку Дюри, котри тиж бул дакеди фодбалер, препоручел же би ме одведол на пробу до нашого найвекшого фодбалского клубу, цо зме и поробели.
Бачи и я ше нашли у престонїци на познатей Маракани.
А цо тераз Мишо
У тедишнї час, тераз уж у прешлим вику, з аутобусом зоз Беркасова до Шиду, з гайзибаном од Шиду сцигли зме до Беоґраду у предполадньових годзинох. Тренинґи на Маракани ше отримую пополадню. Час зме препровадзели у розпатраню Беоґрада.
– Пополадню, предлужує свою приповедку Мирослав, тренер Жарко Неделькович, роспоредзел нас хлапцох котри зме допутовали до двох екипох, дал нам лабду и провадзел нас як бавиме.
Кед тренинґ закончени, Жарко Неделькович зоз пальцом указал котри бавяче оставаю у Гвизди, а другим подзековал на сотруднїцтве. Я бул медзи тима котри остали и ту ше мой живот меня зоз кореня.
Нє можем описац чувства котри ше зволновали у мнє.
Нєвироятно, придзеш зоз малого места на найвекши стадион у жеми, до велького спортского клуба и вони ци гваря ти ту оставаш.
Приємне нєсподзиванє котре нас у тей хвильки облапело найлєпше описал мой бачи, котри теди , обачлїво возбудзени гварел : „А цо тераз Мишо?“
Понеже сом уж закончел основну школу у Шиду, принєсол сом одлуку же штредню школу упишем у Беоґраду, и ту предлужим свою спортску кариєру.
Приповедка идзе далєй. Tеди у Червеней Гвизди бул обичай же ґенерация пионирох котра преходзи до кадетох, бави предбависко пред змаганє першого тима, зоз ґенерацию пионирох котри приходза.
Мирослав Балащак такой , лєм после даскелїх тренинґох, мал нагоду бавиц пред полну Маракану.
Зоран Марковић
Јелена Перковић
*реализацију пројекта „Руснаци зоз Войводини“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.
Leave a Reply