Фамелия Марчак: Причина за щесце вше иснує (1)

Перши потомки фамелиї Марчак зоз карпатскей обласци, нашли ше на просторе нєшкайшей Сримскей Митровици стредком XIX веку, дзешка у раздобљу Баховогo абсолутизма, у чаше кед ше интенюивно робело на вибудови гайюибанскей драги у царству, як приселєнци другей рускей миґрациї.

Асимиловали ше такой по приселєню и руски язик ше траци уж у перши даскельо роки, алє од рокох хтори прелєцели по нєшка, вше за себе знали же су Руснаци и так ше и вияшньовали.

Як найстаршого потомка здогадую ше през фамилийну приповедку баби Мариї Марчак, хтора як млада остала ґдовица зоз сином Саву.

У першим моменту по приселєню, Марчакови ше населєли на простору валала Латярак.

Марийов син Сава, оженєл ше як млади зоз Рускиню Сузану народзену Юрек. Сузана ше познєйше спомна як баба Ружа, по свойому назвиску хтори достала, бо любела ружи.

Сава Марчак бул мудри и аґилни, вредани и нєзастановююци. Бул порихтани у новим краю, до хторого пришли його родичи, пре лєпши живот, успец и створиц лєпши и безбрижнєйши швет за себе и своїх потомкох. Мал воденїцу на гату у Латярку, од хторей витримовал себе и свою фамелию. У малженстве зоз Ружу (покресцене Сузана), достал два сина, Дюру и Ивана.

Щесце нє тирвало длуго, Сава млади умера, а иза його остала млада ґдовица зоз нєполнима 24 роками живота и двоме мали синове.

Миленко Пиља, Пеле, Миленко Марчак, Марицки

Даскельо роки познєйше, селя ше до Митровици до Паробродскей улїци, дзе ше Ружа Марчак преодала за Перу Лисца и зоз другого малженства достава ище двойо дзеци Йована и Мару (одато Шенер).

Йован ше у обставинох войнових случованьох нашол у зарабнїцтву у Русиї, одкадз ше, на щесце, после извесного часу врацел живи.

Там у далєким зарабнїцтве ше залюбел и кед ше врацал до отечества и родней Митровици, ризикуюци свой живот, у гайзибану шверцовал любов свойого живота, свою супругу, красну Українку Веру, чиї ше пах и вкус “Борща”, (националного єдла велїх славянских народох), юшка зоз говедзини, цвикли и желєняви, преприповеда з колєна на колєно.

Дюра Марчак, мой дїдо, як млади робел як роботнїк на тедишнєй Олєарнї, потим у Житопромету и Митротрансу у Митровици, оженєл Мадярицу Агнески Маджар и зоз ню добил тройо дзеци Владимира народз.1932, Миленка, мойого оца народз. 1933 и Веронику народз. 1935 року у Сримскей Митровици – гутори його унука Дубравка Костадинович народзена Марчак.

Иван Марчак виучел за вилївача, робел на Гайзибанскей. Оженєл ше зоз Юлку Ковач и сновал свою фамелию хтора постала богатша за штверо дзеци.У своїм малженстве Иван и Юлка Марчак мали Ану, Саву, Миру и Владу. Зоз Паробродскей улїци селя ше на Румску Малту, на окраїску тедишнєй Митровици дзе починаю самостойно свойо животи – приповеда Дубравка.

Бака Софија Пењашковић, рођ, Јашчур

Мена заступени у прешлосци фамелиї: Мария, Сава, Иван, Дюра, Владимир, Юлка, Агнеска, Вероника, Миленко, Ана, Сава, Мира, Влада, а у терашньосци мена членох и потомкох: Вера, Дубравка, Ибрахим, Ядранка, Тияна, Дарко, Ивана, Миряна, Деян, Мирослав и Весна.

Друга шветова война нам зоз своїма стахотами претаргла започати дзецинства.

Нє було нєдостатки у єдзеню, бо зме у дворе вше мали вельо кури, гуски, качки…

Оцец тримал и покрадзме пиньвицу пица, у тот час ше пило на гарчички.

Добре ше здогадуєм, як нас, дзеци, гнали зоз побрежя рики, бо по Сави плївали леши пострадалих.

Єдного войнового Крачуна, ми мали дзеци шедзели зме за столом, бавели зме ше, так цо зме под партком вицаговал сламу. Хто вицагнє найдлугшу буце длуго жиц, а хто вицагнє кратши, будзе кратше жиц.

Мой найстарши брат Влада, вицагнул найкратши фалат слами под партком и прето барз плакал – здогадує ше дзециньства Миленко Марчак.

Того истого войнового року, Марчаково дзеци Влада, Миленко и Вероника бавели ше у сушедстве у Йошки Лисац у Паробродскей улїци.

Були то роки, кед нє було тельо радио апарати, „шкатули хтора приповеда“, а шицки ю, окреме дзеци, барз жадали.

У єдней хвильки, дешецрочни Влада у скритей часци двора нашол нєзвичайну направу и ришел од нєй справиц радио. Вжал дроти и гвозди и рушел до майсторства.

Нажаль, нєзвичайна направа була заостала нємецка бомба.

Дуркаюци по нєй,  бомбу активовал и вона почала пищиц, а мали Влада весело скричал: “Направел сом радио” и по експлозиї, погинуо на лїцу места.

Миленко прешол зоз лєґчейшим покалїченьом, а Веронику је одруцела детонация, алє обидвойо прежили.

Миленко Марчак

Як же ше здогадуєм його дзецинского, счарнєтого, мертвого лїца. Безазлене дзецинске бависко ше у хвильки претворело до нєщесца и шмерци. – приповеда його шестра Вероника.

Як дзеци ходзели зме до церкви. У цеку войни священїк бул Илия Ванчик, вон нам преподавал виронауку у основней школи, а познєйше, после ошлєбодзеня пришол священїк Мирон Гирйовати.

После войни, трецу класу сом рушела до руского оддзелєня и рушели зме учиц предмети и руски язик, учителька була Мария Шарик зоз Бачинцох, алє ше оддзелєнє пощвидко по ошлєбодзеню загашело.

Школованє зме предлужели на сербскогорватским язику, а учитель нам бул Божа Милакович – здогадує ше Вероника послевойнового периода.

Ми були класична роботнїцка фамелия, алє нам нїчого не хибело. Воспитанє було строге и барз правичне. Оцови и мацери зме двоєли, а поготов старшим особом. Учени зме почитовац старших. Кед би нам случайно вилєцело “ТИ”, вилєцела и пляска прейґ устох. Достаточне було же би це родичи лєм попатрели и такой ши знал „кельо годзин“. Хиби тото воспитанє и у нєшкайши час, нє треба дзеци биц, алє бешеди з нїма и строгосци не завадза.

Нє було богати бависка, у сушносци нє було бависка вообще, лєм дзепоєдна лабда або бабка ,алє було досц мриї. Дзеци ше бавели, джмурки, здоганяня, пилцики, прескакали ше виячи, штранґи, кликери…

Було достаточне шицкого, як сом гварела, алє зме нє видумовали, були зме скромни и задовольни зоз гевтим цо зме мали. Едли зме цо зме мали, капусту и кромлю у шицких вариянтох, пасулю, насухо зоз кромплю, тарки зоз капусту….шицко…нєдзелю бул обовязни богатши полудзенок хтори подразумйовал месо и колачи.

Владимир Балащак

*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.

Be the first to comment

Leave a Reply

Your email address will not be published.


*