Здогадованя

Кед сом пришол до Сримскей Митровици 1948.року, барз сом ше зачудовал и несподзивал же Руснаци у Митровици нє бешедую по руски, односно нє чуваю и нє пестую нашу руску бешеду, а маю нашу церкву, теметов, паноца хтори бул народзени у Сримскей Митровици, Илию Ванчика (1884-1949). У тот час и дзеци паноца Ванчика були познати при Руснацох: дзивка Вира робела як учителька у Руским Керестуре, а син Иван бул активни у Союзу руско-українскей школскей младежи, дзе бул секретар.

(По спознаню, Иван Ванчик ше у мено бачванско- сримских школярох одпитал од покойного владики др Дионизия Нярадия 1940.року).

Руснаци у Сримскей Митровици мали и шпивацке дружтво,хторе шпивало церковни духовни шпиванки, а после Другей шветовей войни ту бул основани и Одбор Рускей матки, чий предсидатель  бул Дюра Павлович, а секретар Петро Пера Петрень.Учителька у Митровици у тот час була Мария Шарик зоз Коцура. У Сримскей Митровици жил и Яанко Ґрайцар зоз Шиду хтори у тот час бул подпредсидатель Рускей матки чийо шедзиско було у Руским Керестуре.

Пред тим як сом пришол до Митровици бул сом у Андрияшевцох-Роковцох дзе було 12 руских фамелиї.Ми там шицки знали нашу руску бешеду.

Зоз аматерску роботу сом ше случайно почал занїмац дзекуюци нашим просвитним и културним роботнїком Дюрови Варґови, Васильови Мудрови и Владимирови Рогальови, по походзеню зоз Соту у Сриме и моей шестринїци Наталиї Абодїйовей, одатей Пейович.

Кед 1951.року за учительку пришла Наталия, сцигла инициятива од спомнутих просвитних роботнїкох зоз Руского Керестура же би ше основало Културно-просвитне дружтво у Митровици, алє ше поставело питанє як розпочац тоту активносц, кед Дом вжала держава, а по руски знали лєм я и  учителька Наташа.

Бешедуюци зоз младима вони пристали же би ше основало културне-просвитне дружтво.

Теди у Митровици тримал карчму наш Руснак Дюра Ґрабаня.Попри карчми, дзе ше точело пице, вон мал и векшу салу у хторей отримовани рижни преподаваня. Бачи Ґрабаня нам допущел же бизме ту отримали сновательну схадзку на хтору пришли коло 30 млади Митровчанє.Попри нас Руснацох було ту и Українцох и Словакох.

На схадзки догварене же би ше основало КПД хторе ше мало волац „Йосип Цундра“, по єдному младому леґиньови Митровчанови хтори погинул у войни.

На истей схадзки вибрани сновательни одбор.За предсидателя вибрани Славко Пап Петраньов, за секретара Наталия Абодї, за касира Франя Бесерминї, а члени були Пера Беднар, Божица Ванчик, Йосип Колешник и Сея Олеяр.

З тей нагоди принєшени шлїдуюци задатки: же би ше глєдало дом, нашло театрални фалат хтори би найбаржей одвитовал нашим условийом роботи, потим же бизме ше догварели зоз бачиком Ґрабаньом коло отримованя танцох у сали, як и же бизме обезпечели голєм даяки средства за початок нашей роботи.

Мушим повесц же бачи Ґрабаня такой пристал на нашо предкладаня и так ми почали себе обезпечовац условя за роботу.

Учителька Наталия нашла театрални фалат хтори ше волал „Два малженски пари“,лєм же го требало преложиц на нашу руску бешеду. Ту нам помогол наш паноцец, хтори теди службовал у Митровици о. Мирон Гирйовати.

Вон ше прилапел помогнуц нам и преложиц текст зоз учительку, лєм же зме мушели обезпечиц папер. Церква мала свою машину за дурканє, алє паноцец то мушел зробиц потайнє же би власци нє дознали, бо у тот час паноцове нє шмели робиц зоз младежу.

Була то перша руска представа после войни.

Перши аматере хтори бавели були:

-першу малженску пару бавели Йосип Колешник и Даница Ференц,

-другу малженску пару бавели Петро Беднар и  Божица Ванчик,

-богату ґдовицу бавела Сея Олеяр,

-циґанку Драґица Беднар,

-тарґовца Янко Чиєф

– слугу сом бавел я, Славко Пап Петраньов.

Так ше почало зоз роботу, алє Дом за нашу роботу зме нїяк нє могли достац, а у бачика Дюри сала нє мала зогриванє та мушим припознац же пришла до питаня наша дальша робота.

Понеже я , так повесц, найвецей ходзел и допивал коло просторийох, односно, нашого дому, єдного дня ме поволали до комитету младежи и предложели же бизме  ше приключели Синдикалному дружтву „Бранко Радичевич“, дзе нам обецане же достанєме шицко цо треба єдному дружтву, з тим  же зме годни затримац свой Одбор, свою бешеду и шицко цо зме мали, лєм же ше будземе волац Синдикалне културно-уметнїцке дружтво „Бранко Радичевич“-Секция за Руснацох.

Прилапене предкладанє комитету , а источашнє ме меновали за руководителя  Секциї за Руснацох.

Но, ми и надалєй отримовали танци у карчми бачика Дюри, а 1952. року зме орґанизовали дочек Нового року зоз програму по руски хтору порихтала учителька Наташа  зоз дзецми цо виучовали нашу бешеду.

После зме порихтали „Франтовнїцу“ од Петра Ризнича Дядї,у хторей бавели: Йосип Колешик, Петро Беднар, Божица Ванчик и Славко Пап Петраньов, потим „Bалаского байбера“  зоз ґлумцами : Йосип Колешик, Славко Пап Петраньов, Франя Бесерминї, Петро Лещук, Боьица Ванчик, Даница Ференц, Владо Желем, Бошко Ференц як и вецей дзивчата и хлапци хтори танцовали у фолклоре.

Кед ше учителька Наташа одала, цала робота Секциї так повесц спадла на мнє: бул сом и режисер, и предситатель, и секретар, и ґлумец… Вредно зме шицки робели и нїч нам нє було чежко.

Шлїдуюци театрални фалат ше волал „Кумованє“ котри бавели: Славко Пап Петраньов, Франя Бесерминї, Михал Абодї,Илия Лашкиєвич, Олґа Сапун, Марица и Анкица Бобалїк, Мария и Йосип Пап.

Як руска секция , ми нашо представи давали нє лєм у Митровици, алє зме нащивйовали и нашо места  и то: Бачинци, Шид, Бикич Дол, Миклошевци, Петровци, а у Бачкей зме були у Руским Кереструре, Новим Орахове и Дюрдьове.

Можем повесц же зме у шицких наших местох були барз крашнє прияти.

Кед фудбалере  „Русина“ у Руским Керестуре преславйовали 30 роки, зоз Сримскей Митровици ишли тоти фодбалере: Лука Олеяр, Ивица Бобалїк и Илия Велики.

Найактивнєши аматере були : Наталиљ Абодї, Михайло Абодї, Петро Беднар, Драґица Беднар, Франя Бесерминї, Аница Жмура, Влада Желем, Йосип Колешник, Михайло Лещук, Илия Лашкиєвич, Мишко Ожвалд, Сея Олеяр, Славко Пап Петраньов, Мария Пап, Йосип Пап, Марица Рогаль, Даница Ференц, Бошко Ференц, Ивица Федош, Йосип Федош, Јанко Чиєф, Божица Ванчик, Олга Сапун, Штефица Чмиль, Олґа Гарди, Мария Гарди, Мита Хорбаль, Мария и Аница Бобалїк.

По презвискох мож видзиц  же окрем нас Руснацох було и Українцох и Словацох, алє зме шицки вредно робели, складали ше и дружели ше.

Синдикалне дружтво додзельовало плакети и подзекованя за активносци и закладанє у културним дружтве, та так и нашо Руснаци доставали тоти признаня.

Кед 1956.року пришло до реорґанизациї Синдикату, дружтва за културу ше розформовали и престали з роботу.Теди и наша Секция престала зоз активносцима, бо зме вецей нє мали можлївосци предлужиц свою роботу.

Шицко пошло до историї.

Славко Пап Петраньов

*реализацију пројекта „Руснаци зоз Войводини“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.