ROMI VOJVOĐANI: Mobilizacija katar o ćidipe ando maripe opral čhavrrikano inzaripe

Ćidipe forutnengo andar e Sremska Mitrovica Maškaripe palo ekonomikano vazdipe e Rromengo CEUR teljarda te nakhavel e pharimata save silen e čhavorra save bućaren pe droma. Ande sajekh baro foro sile manuša save inzaren o vas. Ando proejkto Mobilizacija katar o ćidipe ando maripe opral čhavrrikano inzaripe vastesko pale savo dija love Ministripe pale bući, bućaripe, marimašće thaj socijalne phučimata ande godoja vrjama, Maškaripe palo ekonomikano vazdipe e Rromengo ketane e institucionenca sistemošće ćerda khuvdipe savo trubul te marelpe opral čhavrrikano inzaripe vastesko.

Ažutimava katar baro đindo ažutorengo thaj partnerske ćidimata andar aver foruja, projekto nakhadape ande inke štar foruja ande Srbija. Paše Sremska Mitrovica ando projekto line kotor Novi Bečej, Novi Sad, Obrenovac thaj Čačak. Andar godova kaj Srbijaće kanonuja či pindžaren čhavrrikano inzaripe vastesko, a pe droma si sa majbut kasaje čhavorra. Kamipe projektosko sas te sa e institucije khuvenpe maškar peste thaj te nakhaven e arlimata. Pe amari bibah, ando nakhavipe projektosko line kotor sa e institucije sistemošće, policija, maškarimata pale čorrmašći bući, lolo trušul, sikavne thana thaj e forošće korkoroortuimata. Ćerdape khuvdipe thaj areslope džiko jekhutno svato kana si phučipe pe mehanizmuja pale komunikacija thaj dipe inćarimasko čhavorrenđe save inzaren o vas pe forošće droma. Pašo Paše godova kaj fundosardinepe forošće khuvdimata, nakhadinepe vi e bućarimašće sikadimata pale čhavorra, manuša thaj manušnja save inzaren o vas pe droma ande liparde pandž foruja. But phare si te ašunenpe vorta, čače informacije katar e čhavorra, manuša thaj manušnja save inzaren o vas, andar godova kaj but katar lende daravenpe, majanglal kola saje inzaren o vas organizuime. E bući viktimenca si but pharo thaj trubulimasko si te organizuilpe bući ando kontinuiteto thaj te ande gadaja bući len kotor sar e bigavermentošće ćidimata, gajda vi e sa e institucije save ćeren bući ando kotor viktimizacija čhavorrengo, a vi e forutnengo. Amen pe droma dijam e čhavorrenđe thud, mangrro, guglimata, fujravipe, sar vi e trubulimata palo sićope. Ćerdam rodipe po tereno savo sikada kaj ohtovardeš čhavorra inzaren o vas pe droma katar o foro Sremska Mitrovica thaj sajekh katar lende sile averčhando dićhipe andar soste godova ćerel. Godova kaj e čhavorra nakhaven but vrjama pe droma anel riziko, pharipe pale eksploatacija savji šaj te ćerel bipindžarde manuša thaj kupe, sar vi e majpaše džene andar e familija. Pale čhavorra si mištipe kaj šaj loće te theren love priko inzaripe vastesko. E manuša kale čhavorrenđe den e love, andar godova kaj haćaren lenđe pharimata. Čačipe si kaj but katar kola saje inzaren o vas len kotor vi ande kriminogene buća. Ande Sremska Mitrovica inzaripe vastesko naj organizuime thaj či nakhavelpe planirime, so naj ande aver foruja kaj inzaripe vastesko nakhavelpe planirime. Varesave katar kola saje inzaren o vas pe droma si ladžavo te godova ćeren ando piro foro thaj andar godova džan ande aver foruja, varekana vi ande aver raštre kaj lengo familijako identiteto naštik loće te pindžarenpe. Varesave katar kola saje inzaren o vas, sar lipardam, godova ćeren profesionalno, inzaripe vastesko si pale lende bući. Vi purane save inzaren o vas šaj katar tumende te roden e love, a na o mangrro. No, varesave manuša inzaren o vas andar godova kaj či džanel averčhande te therel so trubul palo trajo. Baro đindo čhavorrengo musaj te inzarel o vas andar godova kaj trajin ando baro čorrpe thaj pharipe, silen pharo socijalno statuso. Sa kola saje inzaren o vas, na numa kola saje godova ćeren profesionalno, a majanglal e čhavorra, kamen ažutipe. Jekh projekto savo nakhavelpe jekh brš si cara te šaj kava pharipe te nakhavelpe. Palo nakhavipe katar kava pharipe trubulimasko si inćaripe katar e institucije sistemošće thaj katar sajekh forutno savo gndil kaj gajda kaj dela jekh dinari čhavorrešće savo inzarel o vas nakhavel vi lesko pharipe.

Slađana Teodorović 
* Projekat „Romi Vojvođani“ sufinansiran je od strane Pokrajinskog sekretarijata za kulturu, javno informisanje i odnose s verskim zajednicama. Stavovi izneti u podržanom medijskom projektu nužno ne izražavaju stavove organa koji je dodelio sredstva.

Be the first to comment

Leave a Reply

Your email address will not be published.


*