Орґанизовани културни живот Руснацох у Бикич Долу почал од 1941. року, кед справена и школа. Перша културна подїя хтора значна за Бикич Дол було пошвецанє фундаментох основней школи 21. децембра 1941. року, кед у тим месце отворена школа. Перши учитель Михайло Ковач ше приселєл зоз сушедного Беркасова, а у рамикох школского будинку мал квартель. Школа почина робиц 12. марца 1942. року, алє учитель Михайло Ковач и скорей почал зазберовац дзеци и тримац преподаваня, а зоз старшима у Бикичу почал шпивацки проби, дзе було коло 30 членох.
Пре войново обставини и збуваня на Сримским фронту, културна робота у валалє престала аж по 29. юлий 1945. року, кед на шветочносци з нагоди законченя школского року виведзени 26 точки, хорски шпиваня и даскельо театрални фалати. Учитель Ковач куповал кнїжки за школску библиотеку – 1945. року купел 14 нови наслови. Пред сам конєц школского року школяре участвую зоз двома хорскима шпиванками на велькей програми у Шидзе, вєдно зоз школярми з Беркасова, Моловину, Соту и Привиней Глави.
На инициятиву учителя Михайла Ковача, у Бикич Долу основана филияла Рускей матки,. У рамикох Рускей матки 9. януара 1946. року основане и КПД „Иван Котляревски“. У рамикох того дружтва, хторе на самим початку мало коло 60 членох, основани и мишани хор и аматерски театер.
Аматерске дружтво пририхтовало даскельо театрални фалати: „На синокосу“, „Будала“, „Жена-бида“ и други, та зоз нїма наступели перше у своїм месце, а познєйше и у других местох у општини.
КПД „Иван Котляревски“ 1949. року пририхтує даскельо театрални фалати, и то „Желєни конар“ и „Наталка Полтавка“. Зоз першу представу Дружтво участвує на змаганю рускох драмских секцийох у Шидзе и 5. марца 1949. року забера друге место. Дружтво зоз спомнутима драмскима фалатами наступело у Петровцох, Миклошевцох, Бачинцох, Руским Керестуре и Вербаше.
Библиотека и читальня 1950. року премесцени зоз школи до Задружного дому. Ту 25. априла, як госци, участвую члени КПД „Гавриїл Костельник“ з Руского Керестура зоз своїм тамбуровим оркестром, фолклором и шпивачами, як и КПД „Дюра Киш“ зоз фолклором и хором. Курс за музичну и фолклорну секцию отримани 25. януара 1951. року и тирвал пейц днї. Того дня основана и музична секция у Бикич Долу.
Од 11. по 12. април 1952. року у Бикичу отримана смотра драмских секцийох КПД за Срез шидски. КПД „Еуґен Бревак“ зоз Бачинцох наступело 11. априла зоз представу „Франтовнїца“ Петра Ризнича, а КПД „Бранко Радичевич“ зоз Сримскей Митровици зоз представу „Валалски байбер“ од Вукосавлєвича. КПД „Иван Котляревски“ наступело 12. априла зоз представу „Подозрива особа“. На смотри ше нє зявели КПД „Дюра Киш“ зоз Шиду и КПД „Тарас Шевченко“ зоз Беркасова.
Школского 1962/1963. року до Бикич Долу як учителє приходза Мелания и Василь Мудри, ушорюю библиотеку хтора у тим чаше мала лєм 86 кнїжки и починаю з орґанизованьом културно-просвитних активносцох у школи, а потим и у валалє, дзе отримани програми за Дзень Републики (29. новембер), Нови рок, Дзень женох и други.
Концом 1968. року до Бикич Долу приходзи сотруднїк Сербскей академиї наукох и уметносцох др Душан Дрляча и роби на виглєдованю у вязи з колонизацию и насельованьом Руснацох до Сриму.
Културни живот ше поєдинєчно одвивал на швета хтори були вязани вецей за школу як за дзепоєдни датуми значни за сам валал. Так було по 1997. рок, кед на фестивалє „Червене пупче“ наступел Бикичан Зденко Лазор зоз шпиванку „Рибар“. На спомнутим фестивалє наступело и КУД Бикич, хторе з тей нагоди позберал Славко Надь з Руского Керестура, тедишнї учитель у Бикич Долу.
КПД „Дюра Киш“, по опредзелєню у своїм Статуту, 2007. року почало преширйовац свою дїялносц и на други руски места у шидскей општини. Танєчна ґрупа КПД „Иван Котляревски“ почала з роботу 2007. року. Од 2011. року, зоз приходом Борислава Барни за кореоґрафа до Бикич Долу, у КПД „Иван Котляревски“ формовани два ґрупи танєчнїкох, и то младша и старша фолклорна ґрупа.
Шпивацка ґрупа Бикичанки перши наступ мала 2009. року, кед 4. децембра у валалє означовани Дзень Месней заєднїци и источашнє Дзень ошлєбодзеня валалу. Бикичанки у тим чаше почали робиц у рамикох Здруженя женох.
Од 2011. року ґу женскей шпивацкей ґрупи придружує ше и новооснована хлопска ґрупа и на наступох участвую або самостойнє, або вєдно обидва ґрупи як мишана шпивацка ґрупа.
Як коруна роботи мишаней шпивацкей ґрупи 2015. року зняти CD хтори ноши назву Хижочко стара.
На початку 2009. року, у орґанизациї РТ Войводини, а на идею о. Михайла Режака, у рамикох отримованя традициї Руснацох у Сриме, зняти филм Вилїйов вечар у Бикич Долу, дзе участвовали шицки жителє Бикич Долу, а хтори члени КПД „Иван Котляревски“. У терашнїм чаше у Бикичу єст два културни манифестациї: єдна традицийни Руски бал, а друга традицийни обичай рубаня майового древка, манифестация под назву Пришли нам Русадля. До обидвох манифестацийох уключени шицки члени КПД з Бикич Долу.
Зденко Лазор
*реализацију пројекта „Руснаци зоз Войводини“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.
Leave a Reply