Фамелия Лазор Бикич Дол Фамелия Лазор Бикич Дол
„Нїґдзе нє понагляй, сцигнєш шицко“. Перши приселєнєц презвиска Лазор приселєл ше зоз срезу гораду Бардийов, нєшкайша восточна Словацка, зоз места Криве стредком XIX вику.... Фамелия Лазор Бикич Дол

„Нїґдзе нє понагляй, сцигнєш шицко“.

Перши приселєнєц презвиска Лазор приселєл ше зоз срезу гораду Бардийов, нєшкайша восточна Словацка, зоз места Криве стредком XIX вику.

Перши приселєнци приселєли ше до брегох понад Бикич Долу у Сриме, точнєйше коло пиньвици Горовица, дзе у першим чаше жили у жемунїцох.

У матрикулох перши Лазор хтори уписани Янко Лазор .

У селїдби зоз горнєй часци до долнєй часци царства путовали на коньох, волох и пешо.

Кед сцигли на одредзиско, їх живот у жемунїцох тирвал барз кратко. Понеже приходзели вєдно зоз фамелию и сушедами, такой почали єдни другим помагац и будовац набивани хижи прекрити з надом.

У новим краю, такой по приселєню були наднїчае и добри косаче на панскей жеми и велможских маєткох, же би пошвидко здобули, хасновали жем хтору викерчели и висушели за свойо потреби, а познєйше куповали свою.

Познєйше, овладавали зоз рижнима занатама и поставали углядни занатски роботнїки.

Занати хтори у прошлосци були заступени були хасновити и мушели ше под прициском живота жвидко виучовац, а то: колесарски, кошаркарски и ковальски.

Источасно зоз занатом занїмали ше зоз жемлєдїлством и статкарством, а менєй винїцарством и то виключно за свойо потреби.

Занати ше нашлїдзовали и як цо ковальски остали присутни по нешка.

Нєшка Лазорово професоре руского и росийского язика, психолоґи, инжинєри и углядни занатлиї ковалє и клянкаре.

Дзеци по приселєню нє мали дзецинство або у дзецинских бавискох и безбрижносци уживали барз кратко.

Рано починали зоз роботу вязану за маєток: чували статок и швинї и легчейши роботи у полю.

Аж познєйше интенюивни їх друженя почали на прадкох, мольбох, забивачкох, алє и тоти друженя були преплєцени зоз роботу.

Мена заступени у фамелиї Лазор: Янко, Илия, Ана-Ганча, Мария-Марча, Никола, Єлка и Юла.

Пера и Илија Лазор, 1954 рок. Бикич

Мена ше преношели за часу на час зоз колєна на колєно.

Облєчиво було досц єдноставне. Дзеци зоз фамелиї ношели шмати хтори були типични за тот час и гевти шмати цо им мацери шили.

Хлапци углавним прейґ лєта мали панталони зоз сукна и кошулжки зоз конопи, дзивчата, девојчице сукнї ткани зоз грубого платна и аж познєйше гадбавни блузки. За хлопох були характеристични гунї и жимски шапки за главу.

Святочне руске облєчиво и шмати ношели з нагоди одходу до церкви, або инших святочних нагоох, на приклад у свадзби.

Под час Другей шветовей войни, мужски члени масовно приступали до Ноб-у, а жени ше старали о обисцу у дзецох.

Илия Лазор бул одликовани за заслуги у войни.

У цеку войни, жени и дзеци часто сцекали пред нєприятельским войском, а по здогадованю старших, валал Бикич дол на даскельо тижнї остал цалком празни.

По законченю войни, живот ше помали почал врацац до нормали.

Потомки ше врацели ґу жеми и старим занатом, а почали ше занїмац и зоз резбарию и обробком древа, зоз правеньом мастилкох зоз пиря гуски, хтори ґаздинї хасновали у обисцу.

Кед 1958. року у Бикич Долу отворена месна канцелария перши уписани член тей фамелиї, Яким Лазор.

Жени у фамелиї були важни слуп. Були моцного менталного склопу, вредни и пожертвовани. Були всестрани, коло вареєа хторе ше подрозумйовало, мишеня хлєба, осуху, правеня колачох, и чежких роботох у вязи зоз жему, статком и одкармйованю дзецох знали шиц, штрикац, вишивац, плєсц, и ткац и у тих роботох були способни.

Тоти роботи кончели углавним вжиме, кед у полю и коло статку нєт тельо роботи.

Самостално учели билїц зоз мустру типичну за Войводину и Срим.

Єлка Лазор ше окреме видвоєла у самому билєню, те ю глєдали часто, а єй роботи мож видзиц у дзепоєдних обисцох и дзень нєшка. Єй мустри були прекрасни и живописни, а фарба тирваца, прето же Єлка у своєй роботи пошвидко постала добра и постала майстор, мишала до фарби вайца и млєко.

Попри того, Єлка була барз добра у штриканю и шицу зоз шлим фулом.

Штрикала рукавици, шали, трикови и першняки, за потреби свойого обисца, а и услужно без наплацованя.

Попри сербского язика, руски язик у фамелиї ше бешедує по нєшка и на нїм ше спорозумюю у обисцу.

Аж и снахе, хтори нє Рускинї у фамелиї Лазор, прилапели и барю швидко учеки руски язик, цо  случай зоз панї Жельку Гапчак Лазор хтора го нєшка чечно бешедує.

Лазорових нєшка єст у Србиї, Зєдинєних державох, Словацкей, Польскей и Канади.

Цо ше дотиче покарми у прошлосци, млєчни преробки були барз заступени, потим замешка и мачанка зоз печарками хтора ши рихта углавним на Крачун, а рецептуру Руснаци зоз Бикичу принєсли зоз старого краю.

Месо ше єдло внєдзелю.

Кромплї були заступени у шицких вариянтох, а найлюбимше єдло, шницли зоз кромпльох, такволани „Баби“.

У нашкайши час попри зачуваних традицийних руских єдлох за швета и святочни нагоди прилапене и єдзенє характеристичне за Войводину и Срим.

Од насельованя по нєшка фамелия грекокатолїцкого виросповеданя.

Мото фамелиї, хтори Яким Лазор од своїх предкох пренєс своїм потомком: „Нїґдзе нє понагляй, зроби ше“. (Шицко сцигнєш).

Швета хтори ше почитовали у фамелиї Крачун, Велька Ноц и Кирбай (Кирбай у Бикичу је 28. август Успениє Пресвятей Богородици-Велька Матка Божа), и „Завит од ляду“ (швето 03. юния Цар Константин и Царица Єлена, на хтори ше жителє Бикичу завитовали же нїч нє буду робиц, бо им у XIX вику вельки каменєц подполно побил поля).

На початку XX вику почало почитованє святого Илиї, пре мено Илия хторе ше у фамелиї часто повторйовало, та ше и того дня у фамелиї нїч нє роби.

Шлєбодного часу углавним нє було.

Мож повесц же шлєбодного часу за одроснутих членох фамелиї нє було, алє и кед го було, воно преплєцене зоз роботу на прадкох и мольбох. Дзецински бависка у прешлосци за хлапцох лабда зоз ренди, а за дзивчата бабки зоз кукуричанки. Дзеци нє уживали длуго у бавискох, рано одросли и прилапели роботи и учени же би були поштени, вредни и роботни.

Воспитанє дзецох було риґорозное. Старши ґенерациї шицки двоєли, а окреме оцови, мацери и старшима.

Под прициском сучасного часу и XXI вику двоєнє родичом нєстало.

У прошлосци, та и нєшка, Лазорово дзечнє доприноша напредованю валала и общому напредованю и злєпшаню. Участвовали з нагоди будованя школи, церкви, дома култури и базена.

По нєшка члени тей вредней и поштеней фамелиї робя на пестованю руского националного идентитета, обичайох и традициї, та доприноша дружтвеному и културному развою валала.

Децениями и фамелийно члени су КУД-а „Иван Котляревски“ и Здруженя женох „Бикичанки“.

Предки Лазорових спочиваю на валалским теметове у Бикич Долу, а їх потомки чуваю памятки на нїх, їх вредносц и пожертвованосц и анї кус лєгки живот.

Стихи хтори ше децениями чуваю за Вилїю вечар глаша:

Крачунска винчованка

(записана од Якима Лазора)

Винчую, винчую!

Колбаси на пеци чую.

Винчовати не престану,

Док до писка не достану.

(Собешеднїк о фамелиї Лазор, Зденко Лазор)

Владимир Балащак

*реализацију пројекта „Русинске породице у Срему – Руски фамелиї у Сриме“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.

Nema još komentara.

Budite prvi koji ćete ostaviti komentar.

Odgovori

Your email address will not be published. Required fields are marked *


*

Skip to toolbar