Свойо активносци Руснаци у Сримскей Митровици ожили 30- тих рокох прешлого вику. Сримскомитровицики новини „Сремски земљорадник“ писали 26.априла 1935.року же на шветочни способ отворени...

Свойо активносци Руснаци у Сримскей Митровици ожили 30- тих рокох прешлого вику.

Сримскомитровицики новини „Сремски земљорадник“ писали 26.априла 1935.року же на шветочни способ отворени будинок Руского дому у хторим ше млади могли заинтересовац за духовни науки и през преподаваня, забави и представи значнєйше допринєсц културно – просвитному животу Руснацох.


 Шпивацке дружтво и о.Илия Ванчик 1939.року Сримска Митровица

У новинох далєй писало же порта за будованє Руского дома купена од Ванчиковей фамелиї 1933.року за 4000 динари, же є на красним месце и же енерґични и вредни Руснаци почали з вибудову анґажуюци ше сами.

З будовательнима роботами руководзел Илия Димитришин, а кед роботи закончени, дом на шветочни способ отворени у априлу 1935.року.

У рамикох Руского дома була и Читальня, хтора мала понад 120 членох и чий предсидатель бул священїк о.Илия Ґарапич и шпивацке дружтво.

У рамикох Дома бул и квартель за дзияка.

О своєй културней активносци, после войни, писали 20.авґуста 1945.року Руснаци зоз Сримскей Митровици до теди основаного „Руского слова“ у Руским Керестуре, же маю  91 предплатнїка за новини и же назберали 1238 динари за фонд „Руского слова“. У писме , медзи иншим, пише и тото: „Нас Руснацох у Митровици єст коло тисяч и гоч нє знаме наш красни руски язик…будземе ше намагац прешириц културу, оснивац нашу школу у хторей ше дзеци буду образовац у нашим народним духу. Зоз одушевийом зме дочекали нашо народни новини и потераз маме 91 претплатнїка за народни новини.Окрем предплати, посиламе и добродзечни прилог од 1238 динари за фонд нашей преси“.

Список даровательох зоз Митровици за фонд „Руского слова “ у Руским Керестуре: Петар Страценски 200 динари, Ђюра Павлович и Васа Ференц по 100, 50 динари  дали Никола Ломпар, Мишко Рогаль и Иван Страценски, 30 динари Никола Сведа, а по 25 динари Никола Сапер, Ђюра Ґубаш, Филип Годоба, Куруц, Иван Ґрабаня, Стева Страценски, Мара Годоба, Янко Федорш, Стева Ґрабаня, Емил Ференц, Янко Крайцар, Иван Трудич, Йоца Габаньски, по 15 динари даровали  Митро Джмура, Стева Ошйор, а по 10 динари Антун Куруц, Олґа Папуґа, Ксения Молько, Мария Блащак, Максим Прокоп, Васа Фечко, Пера Куруц, Илия Бабалїк, Пера Годоба, по 5 динари Мишко Михайло, Дюра Васильчин, Андри Яношко, Лука Смиль, Дюра Мафтей, Мишко Здинько, Никола Кечкеш, Анка Олеяр, Кристина Хост, Аница Бесерминї, Стева Лабаш, Никола Бурчик, Евица Недев, Илия Блащак, Илия Страценски, Васа Куруц, Андрия Гладик, 3 динари дала  Мария Фечко.

Зна ше же було вецей пробованя же би и дзеци Руснацох у Митровици мали наставу на руским язику. При основней школи (нєшка “Йован Йованович Змай“), школского 1946/47.року отворене оддзелєнє на руским наставним язику. Настава у школи почала 7. Септембра 1946.року, а учителька була Мария Шарик,по походзеню зоз Коцура, хтора пред тим єден час була учителька у Бачинцох. Уписани були 44 школяре. Тото оддзелєнє робело и школского 1947/48.року, а вец престало, та школяре розподзелєни до класох зоз сербским наставним язиком.

О пар роки, точнєше школского 1951/52.року, кед у городзе було 64 руски школяре, знова з боку школских власцох иницироване отверанє руского оддзеленя у Основней школи „Йован Йованович Змай“.

Интересованє родичох за уписованє до рускей класи нє було вельке, так же учителька Наталия Абодї Пейович, двацец троїм дзецом преподавала лєм руски язик, же би звладали голєм мацерински язик и писмо.

Тото оддзелєнє робело  єден школски рок, а вец, по дзеки родичох,престало робиц.

Теди почала робиц и руска драмска секция у рамикох Културно-просвитного дружтва „Бранко Радичевич“.

Секретар Дружтва бул Славко Пап Петрань. Того, 1952 .року, у режиї Наталиї Абодїйовей, пририхтани театрални фалат „ Два малженски пари“ и зоз нїм нащивени руски места у Бачкей и Сриме у хторих жию Руснаци.

Требало прейсц 50 роки же би голем кус ожил културни живот Руснацох у Сримскей Митровици, дзекуюци Дружтву за руски язик, литературу и културу зоз Нового Саду и Дружтву Руснацох зоз Митровици.

На концу 20.вику нєвистати иницияторе и културни дїяче були Ирина Папуґа, Яким Папуґа, Мирон Венчельовски, Нада Колєсар Адамович, Ана Яне Сеґеди, Михайло Ґрабаня, професорки руского язика Златица Сивч Здравич и Драґана Ненадич.

Владимир Балащак

Надпомнуца:

Радомир Прица „Русини у Митровици“

*реализацију пројекта „Руснаци зоз Войводини“ помогло Министарство културе и информисања Републике Србије. Ставови изнети у подржаном медијском пројекту нужно не изражавају ставове органа који је доделио средства.

Nema još komentara.

Budite prvi koji ćete ostaviti komentar.

Odgovori

Your email address will not be published. Required fields are marked *


*

Skip to toolbar